حسینؑ ابن علیؑ کی طرف متوجہ ہونے والا ہر شخص حسینی ہے، علامہ امین شہیدی

انہوں نےکہاکہ ہم نے جلوسِ عزاداری میں شیعہ سنی برادران کو ایک ساتھ نماز ادا کرتے ہوئے دیکھا۔ اہم یہ نہیں کہ ہاتھ بندھے ہوئے ہیں یا کھلے ہوئے، اہم یہ ہے کہ ہم سب کے قلوب پر حسینؑ ابنِ علیؑ کی حکومت ہے اور ہم سب حسینی ہیں۔ عزاداری، حسینؑ ابن علیؑ کے مشن کو زندہ رکھنے کا باعث ہے۔

مہر خبررساں ایجنسی کی رپورٹ کے مطابق، پاکستان کے معروف عالم دین حجۃ الاسلام والمسلمین محمد امین شہیدی نے راولپنڈی میں یوم عاشور کے مرکزی جلوس سے خطاب کیا۔

انہوں نے کہا کہ عزاداری سید الشھداء امام حسین علیہ السلام کا انعقاد اور ماتمی جوانوں کے سینوں پر پڑتے ہوئے ہاتھ یہ بتانے کے لئے ہیں، اگرچہ ہم اکسٹھ ہجری میں موجود نہیں تھے لیکن آج اس لئے میدان میں نکلے ہیں تاکہ کسی اور یزید کی جرأت نہ ہو کہ وہ وقت کے حسینیوں کے مقابلہ میں کھڑا ہو سکے۔ اگر کوئی یہ سمجھتا ہے کہ ماتم و جلوس صرف شیعوں سے مخصوص ہے تو وہ غلط فہمی کا شکار ہے۔ جو بھی عَلَم اور عزاداروں کو دیکھ کر حسینؑ ابن علیؑ کی طرف متوجہ ہوتا ہے اور انہیں اپنا امام و رہبر سمجھتا ہے، وہ حسینی بھی ہے اور کربلائی بھی۔ ہم نے جلوسِ عزاداری میں شیعہ سنی برادران کو ایک ساتھ نماز ادا کرتے ہوئے دیکھا۔ اہم یہ نہیں کہ ہاتھ بندھے ہوئے ہیں یا کھلے ہوئے، اہم یہ ہے کہ ہم سب کے قلوب پر حسینؑ ابنِ علیؑ کی حکومت ہے اور ہم سب حسینی ہیں۔ عزاداری، حسینؑ ابن علیؑ کے مشن کو زندہ رکھنے کا باعث ہے۔

انہوں نے کہاکہ ہمارے لئے ضروری ہے کہ گریہ، ماتم اور علمبرداری اس انداز سے کریں کہ اپنے اندر روحانی سربلندی کو محسوس کر سکیں۔ دشمنانِ نواسہ رسولؐ اس قدر خوف زدہ ہیں کہ جو کوئی بھی باروح عزاداری کا انعقاد کرتا ہے، اس کے خلاف قانونی کارروائیوں کی دھمکیاں دی جاتی ہیں اور ایف آئی آر کاٹی جاتی ہیں۔ عزاداری کو محدود کرنے کی کوشش کرنے والے سن لیں کہ یہ جلوس کسی کے باپ کی میراث نہیں، یہ حسینؑ ابن علیؑ کا جلوس ہے۔ غزہ کے بےگناہ مسلمانوں اور افغانستان و نائجیریا کے عزاداروں کی شہادت نے کربلا کی یاد تازہ کی ہے۔ ان لوگوں نے ظلم کا مقابلہ کرتے ہوئے اور نامِ حسینؑ لے کر اپنی جانیں قربان کی ہیں۔ ہم ہر مظلوم کے ساتھ ہیں اور حسینؑ ابن علیؑ کے نعرہ حریت کے ساتھ ظلم کے خلاف صدائے احتجاج بلند کرتے رہیں گے۔

News Code 1911940

لیبلز

آپ کا تبصرہ

You are replying to: .
  • captcha