مہر خبررساں ایجنسی کی رپورٹ کے مطابق، ایرانی پارلیمنٹ نے قومی اداره برائے مصنوعی ذہانت کے قیام کی منظوری دے دی ہے، جو ایک آزاد ادارے کے طور پر صدر مملکت کی نگرانی میں کام کرے گا۔ اس تنظیم کا مقصد ملک میں مصنوعی ذہانت کے شعبے کو منظم کرنا اور قومی سطح پر اس کو فروغ دینا ہے۔
تفصیلات کے مطابق پارلیمنٹ کے اجلاس میں ارکان نے قومی مصنوعی ذہانت بل کی شق 3 میں ترمیم کی منظوری دی، جس کے تحت موجودہ قومی وسائل کو بروئے کار لاتے ہوئے ایک خودمختار اداره قائم کیا جائے گا۔
ادارے کا سیکریٹریٹ صدر کے ماتحت کام کرے گا اور مختلف سرکاری اداروں کے درمیان ہم آہنگی کو یقینی بنائے گا۔ اس کے سربراہ کا تقرر صدر ایران کریں گے۔
قانون کے نفاذ کے بعد تین ماہ کے اندر ادارے کو اپنا آئینی خاکہ تیار کرنا ہوگا، جس میں نائب صدر برائے سائنس و ٹیکنالوجی، منصوبہ بندی و بجٹ، وزارت سائنس، صحت، آئی سی ٹی، محنت اور تعلیم سمیت دیگر ادارے شامل ہوں گے۔ یہ آئینی خاکہ کابینہ کو منظوری کے لیے پیش کیا جائے گا۔
ماہرین کے مطابق یہ اقدام ایران میں مصنوعی ذہانت کی حکمرانی کو ادارہ جاتی شکل دینے اور قومی پالیسی سازی میں اس کے انضمام کی جانب ایک اہم پیش رفت ہے۔
آپ کا تبصرہ