مقبوضہ فلسطین میں صہیونی تنصیبات پر حزب اللہ کے شدید میزائل حملے، 4 صہیونی فوجی ہلاک

مہر خبررساں ایجنسی نے الجزیرہ کے حوالے سے کہا ہے کہ جنوبی لبنان سے حزب اللہ نے صہیونی فوج کی تنصیبات پر میزائلوں کی بارش کردی ہے۔

مقبوضہ علاقوں سے ذرائع نے کہا ہے کہ گذشتہ چند گھنٹوں کے دوران جنوبی لبنان سے الجلیل میں کم از کم 30 میزائل حملے ہوئے ہیں۔

حزب اللہ نے ایک بیان میں کہا ہے کہ جنوبی لبنان کے سرحدی قصبے خیام میں صہیونی فوج کے قافلے پر میزائل حملہ کیا گیا جس سے دشمن کو شدید نقصان ہوا ہے۔

بیان میں مزید کہا گیا ہے کہ صہیونی قصبے کفرکلا میں بھی حملے میں کئی صہیونی فوجی ہلاک یا زخمی ہوگئے ہیں۔

صہیونی ذرائع ابلاغ کے مطابق حزب اللہ کے حملوں کے بعد کریات شمونہ میں خطرے کے سائرن بجائے گئے ہیں۔ جبکہ گولان میں ڈرون حملے میں 4 صہیونی فوجی ہلاک ہوگئے ہیں۔