مہر خبررساں ایجنسی کے مطابق، ایران اور ترکمانستان کے درمیان گیس کے میگا پروجیکٹ پر دستخط ہوگئے ہیں۔ معاہدے پر ترکمانستان میں ایران کے سفیر علی مجتبیٰ روزبہانی اور سٹیٹ کنسرن ترکمانگاس کے چیئرمین مکسات بابائیف نے دستخط کیے۔
تفصیلات کے مطابق ایران - جو کہ ترکمانستان اور عراق کے درمیان واقع ہے - بغداد کو 10 ارب کیوبک میٹر قدرتی گیس فراہم کرے گا جس کے بدلے میں اشک آباد سے اتنی ہی مقدار حاصل کی جائے گی۔ علاوہ ازین ایرانی کمپنیاں ترکمانستان میں تین گیس پریشر بوسٹر اسٹیشنوں کے ساتھ 125 کلومیٹر طویل گیس پائپ لائن تعمیر کریں گی جس کا مقصد ایران کو گیس کی سالانہ ترسیل کو 40 ارب کیوبک میٹر تک بڑھانا ہے۔
ایرانی سفیر روزبہانی نے گیس کے تبادلے کے معاہدے کو آگے بڑھانے میں مرحوم صدر ابراہیم رئیسی اور وزیر خارجہ حسین امیرعبداللہیان کے کردار پر روشنی ڈالتے ہوئے کہا کہ یہ معاہدہ دونوں ممالک کے درمیان اعلیٰ سطحی مشاورت کا نتیجہ ہے۔
روزبہانی نے گیس کے تبادلے کے معاہدے کو ایران اور ترکمانستان کے درمیان گیس کے شعبے میں تعاون کو مزید فروغ دینے کی جانب ایک اہم قدم قرار دیا۔
آپ کا تبصرہ