سنگاپور کے وزير اعظم سے امریکی اور شمالی کوریا کے صدور کی علیحدہ علیحدہ ملاقات

مہر خبررساں ایجنسی نے رائٹرز کے حوالے سے نقل کیا ہے کہ سنگاپور کے جزیرے سینٹاسو میں امریکہ اور شمالی کوریا کے سربراہان کے درمیان تاریخی ملاقات سے قبل امریکی صدر ڈونلڈ ٹرمپ اور شمالی کوریا کے صدر کم جونگ اون نے سنگا پور وزیراعظم لی ہسیئن لونگ سے ملاقات کی ہے۔امریکی صدر ڈونلڈ ٹرمپ نے سنگاپور کے وزیراعظم لی ہسین لونگ سے ملاقات میں تاریخی سمٹ کی میزبانی پر شکریہ ادا کرتے ہوئے دو طرفہ تعلقات اور باہمی دلچسپی کے امور پر تبادلہ خیال کیا۔ اس سے قبل  شمالی کوریا کے سربراہ کم جونگ اون نے بھی سنگاپور کے وزیراعظم لی ہسیئن لونگ سے ملاقات کی اور تاریخی سمٹ کی میزبانی پر سنگاپور کے کردار کی تعریف کی۔ اس موقع پر سنگاپور کے وزیراعظم نے دونوں رہنماؤں کی سنگاپور آمد پر شکریہ ادا کرتے ہوئے تاریخی ملاقات کے حوالے سے امریکی صدر اور شمالی کوریا کے سربراہ کو ہر قسم کے تعاون کی یقین دہانی کرائی ہے۔