امریکہ کا تعزیتی پیغام، زخم پر نمک چھڑکنے کی مانند ہے، وزیر داخلہ ترکیہ

مہر خبررساں ایجنسی نے الجزیرہ کے حوالے سے نقل کیا ہے کہ استنبول کی استقلال اسٹریٹ پر دھماکے کے پیش نظر، امریکی حکومت نے ایک بیان میں اس دہشت گردانہ کاروائی کی مذمت کی ہے۔

وائٹ ہاؤس کے ترجمان جان پیئر نے کہا کہ ترکیہ کی استقلال اسٹریٹ میں دھماکے کی شدید مذمت کرتے ہیں، ہمیں اس واقعہ میں قیمتی انسانی جانوں کے ضیاع پر نہایت افسوس ہے۔

انہوں نے کہا کہ ہم دہشت گردی کے خلاف جنگ میں نیٹو میں اپنے اتحادیوں کے ساتھ کھڑے ہیں۔

امریکی بیان پر شدید ردعمل کا اظہار کرتے ہوئے سلیمان سویلو نے کہا کہ امریکہ کا تعزیتی پیغام، قاتل کی جائے وقوعہ پر واپسی کی مانند ہے۔

انہوں نے واشنگٹن کو مخاطب کرتے ہوئے کہا کہ بدقسمتی سے وہ لوگ جو ہمیں اپنا اتحادی سمجھتے ہیں اور ہمارے ساتھ دوستی کا اظہار کرتے ہیں وہی لوگ دہشت گردوں کو مالی مدد فراہم کرتے نیز جن علاقوں میں ان کا قبضہ ہو وہاں دہشت گردوں کو پناہ دیتے ہیں۔

واضح رہے کہ گزشتہ روز استنبول کی استقلال اسٹریٹ پر ہونے والے دھماکے میں 6 افراد جاں بحق جبکہ 81 زخمی ہوئے تھے۔