نواز شریف اقتدار میں آئے نہیں بلکہ لائے گئے ہیں/ اگلا قدم کلبھوشن کی باعزت واپسی

مہر خبررساں ایجنسی نے ڈیلی پاکستان کے حوالے سے نقل کیا ہے کہ پاکستان عوامی تحریک کے رہنما ڈاکٹر محمد طاہرالقادری نے کہا ہے کہ پاکستان میں قومی سلامتی کو بھی انصاف نہیں ملا ،پاکستانی وزیر اعظم نواز شریف اقتدار میں آئے نہیں بلکہ لائے گئے ہیں۔ پاکستانی حکومت کا اگلا ہدف کلبھوشن کو با عزت طور پر ہندوستان کے حوالے کرنا ہے۔

انھوں نے کہا کہ جس ملک میں قانون کے بجائے افراد بالادست ہوں وہاں قومی سلامتی کو بھی انصاف نہیں ملتا، کب تک پاکستان کا مفادافراد کی ضرورتوں اور مصلحتوں کی سولی چڑھتا رہے گا؟نیوز لیکس کا ڈراپ سین آخری سین نہیں ابھی بہت کچھ ہونا باقی ہے، نواز شریف اقتدار میں آئے نہیں بلکہ لائے گئے ہیں،قانون کا جنازہ 17 جون 2014 ء کے دن اٹھ گیا تھا جب ریاست نے اپنے 100 شہریوں کو گولیوں سے چھلنی کیا اور پھر ایف آئی آر بھی درج نہ ہونے دی ،اب میڈیا اور’’ گستاخ‘‘ اینکرز اور صحافیوں کے خلاف بڑا کریک ڈاؤن ہو گا،جس ملزم حکومت سے جواب مانگا گیا تھا اس نے الٹی جواب طلبی کرڈا لی، سیٹلمنٹ کی خبر منظر عام پرآنے کے بعد مشرقی یا مغربی بارڈر پر ایک گولی چلنے کی آواز نہیں سنی گئی ۔ عوامی تحریک کی سنٹرل کور کمیٹی کے ممبران سے ٹیلیفونک گفتگو کرتے ہوئے ڈاکٹر طاہر القادری نے  کہا کہ ذمہ داروں کو جواب دینا چاہیے کہ اگر کوئی مسئلہ نہیں تھا تو کئی ماہ تک نیو زلیکس انکوائری رپورٹ پردہ راز میں کیوں رہی اور اسے مسترد کرنے کی ضرورت پیش کیوں آئی ؟ جب حکومتی اور ریاستی معاملات مصلحتوں کا شکا ر ہو جائیں تو پھر وہ دعا کی گھڑی ہوتی ہے ۔ڈاکٹر طاہر القادری نے کہاکہ  قصاص تحریک کے پہلے مرحلہ کے موقع پر راولپنڈی جلسہ عام میں جن خدشات کا اظہار کیا تھا وہ عملی شکل میں سامنے آنا شروع ہو گئے ،قومی سلامتی کے اداروں پر حملوں کی یہ ابتدا ہے ،یہ سلسلہ یہاں نہیں رکے گا ،دیکھتے ہیں کہ اداروں میں لچک اور کتنا صبر ہے؟ ۔انہوں نے مزید کہاکہ ہماری جدوجہد سانحہ ماڈل ٹاؤن کے انصاف کیلئے ہے ، جس دن سانحہ ماڈل ٹاؤن کے قاتل انجام کو پہنچ گئے اس دن پانامہ لیکس اور نیوز لیکس کو بھی انصاف مل جائے گا۔