کوئٹہ میں پولیس سینٹر پر وہابی دہشت گردوں کے حملے میں 20 پولیس اہلکار زخمی

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستان کے صوبہ بلوچستان کے شہر کوئٹہ کے علاقے سریاب میں واقع پولیس ٹریننگ سینٹر پر وہابی دہشت گردوں کے حملے میں 20 پولیس اہلکار زخمی ہوگئے ہیں۔ اطلاعات کے مطابق سریاب روڈ پر پولیس ٹریننگ سینٹر پروہابی دہشت گردوں نے حملہ کردیا اور ہاسٹل میں گھس کر اندھا دھند فائرنگ کردی جس کےبعد فورسز اور دہشت گردوں کے درمیان مقابلہ جاری ہے جب کہ اس دوران اب تک 20 اہلکار زخمی ہوگئے  ہیں جنہیں اسپتال منتقل کردیا گیا۔ پولیس حکام کے مطابق ٹریننگ سینٹر کے نیو ہاسٹل پر حملہ کیا گیا ہے جہاں 200 سے 250 اہلکار زیر تربیت ہیں۔ پولیس حکام نے ٹریننگ سینٹر پر حملے کی تصدیق کرتے ہوئے بتایا کہ سینٹر پر 5 سے 6 دہشت گردوں نے حملہ کیا ہے۔ فائرنگ کی اطلاعات ملتے ہی فورسز کی بھاری نفری موقع پر پہنچ گئی اور سینٹر کو چاروں طرف سے گھیر رکھا ہے جب کہ پولیس کمانڈوز اور ایف سی کے اہلکار ٹریننگ سینٹر میں داخل ہوگئے ہیں جن کا دہشت گردوں سے مقابلہ جاری ہے۔ سیکیورٹی فورسز اور دہشت گردوں کے درمیان فائرنگ کے دوران سینٹر میں زور دار دھماکہ بھی ہوا ہے جس کی آواز دور دور تک سنی گئی ہے۔ صوبائی حکومت نے ٹریننگ سینٹر پر فائرنگ کی اطلاع ملتے ہی شہر بھر کے اسپتالوں میں ایمرجنسی نافذ کردی ہے جب کہ شہر سے مزید پولیس کی نفری کو فوری طور پر ٹریننگ سینٹر طلب کرلیا گیا ہے۔ فورسز نے ٹریننگ سینٹر کے اطراف کے علاقوں کو بھی سیل کردیا اور علاقے میں ٹریفک کو بھی مکمل طور پر بند کردیا گیا ہے۔ اسپتال ذرائع کے مطابق اب تک 20 زخمیوں کو سول اسپتال لایا گیا ہے جن میں سے بیشتر زخمیوں کو ٹانگوں پر گولیاں لگی ہیں جب کہ ایک زخمی کی حالت تشویشناک ہے جسے سی ایم ایچ کوئٹہ منتقل کردیا گیا ہے۔ترجمان پاک فوج کے مطابق کوئٹہ میں پولیس ٹریننگ سینٹر کے مین ہاسٹل پر 5 سے 6 دہشت گردوں نے حملہ کیا ہے جس کے بعد فوری طور پر دہشت گردوں کے خلاف آپریشن شروع کردیا گیا ہے، ایف سی اور پاک فوج کے دستوں نے عمارت کو گھیرے میں لے کر پوزیشنیں سنبھال لی ہیں۔