چین نے برکس اجلاس کے دوران ٹریڈ سیشن میں شرکت نہیں کی

مہر خبررساں ایجنسی نے ہندوستانی ذرائع کے حوالے سے نقل کیا ہے کہ ہندوستان کے شہر گوا میں چین نے برکس اجلاس کے دوران ٹریڈ سیشن میں شرکت سے انکار کردیا۔ اطلاعات کے مطابق نئی دہلی میں جاری 5 ملکی برکس اجلاس میں تجارتی وزارتوں کا اہم اجلاس ہونا تھا تاہم چین کے عین وقت پر انکار کے باعث اہم ترین سیشن منسوخ کر دیا گیا۔

ذرائع کے مطابق برکس کا اہم ترین سیشن پراگتی میدان، نئی دہلی میں صبح 10 بج کر 15 منٹ پر طے کیا گیا تھا جو کہ چین کی جانب سے انکار کے بعد آخری وقت پر منسوخ کردیا گیا، اس سیشن کا مقصد برکس ممالک کے درمیان تجارتی مفادات کو فروغ دینا تھا۔ ایک سینئر آرگنائزر نے دعویٰ کیا اس سیشن کو منسوخ کرنے کا فیصلہ چین نے ایک اہم ملاقات کی وجہ سے کیا۔ بعض ذرائع کا کہنا تھا اس سیشن کو منسوخ کرنے کی وجہ بیجنگ کی جانب سے بھارت پر دبائو بڑھانا ہے۔