مہر خبررساں ایجنسی کی رپورٹ کے مطابق، اسلامی جمہوری ایران کے وزیر خارجہ سید عباس عراقچی جمعہ کی شام اٹلی کے دارالحکومت روم پہنچ گئے، جہاں وہ ایران اور امریکہ کے مابین بالواسطہ مذاکرات کے دوسرے دور میں شرکت کریں گے۔
ایرانی وزارت خارجہ کے ترجمان اسماعیل بقائی نے جمعہ کو تہران کے مهرآباد ایئرپورٹ پر صحافیوں سے گفتگو کرتے ہوئے اس سفر کی تصدیق کرتے ہوئے کہا کہ مذاکرات کا دوسرا دور سنیچر کے روز روم میں منعقد ہو گا، جس کی سربراہی ایران کی جانب سے سید عباس عراقچی اور امریکہ کی جانب سے مشرق وسطی کے لیے صدر کے خصوصی نمائندے اسٹیو وٹکاف کریں گے۔
ترجمان نے واضح کیا کہ یہ مذاکرات بھی سابقہ دور کی طرح بالواسطہ ہوں گے اور ان میں سلطنت عمان کے وزیر خارجہ بدر البوسعیدی ثالث کا کردار ادا کریں گے۔
بقائی کے مطابق روم کا انتخاب عمان کے وزیر خارجہ کی تجویز اور ایران و امریکہ کی باہمی منظوری سے کیا گیا، جبکہ اس حوالے سے انتظامات عمانی حکومت نے اطالوی حکومت سے ہم آہنگی کے ساتھ کیے۔
انہوں نے کہا کہ ایران کا پرامن جوہری پروگرام مکمل طور پر بین الاقوامی قوانین اور معاہدوں کے تحت ہے اور ایران اپنے قانونی و جائز حقوق کے تحفظ اور پرامن ایٹمی توانائی کے استعمال کے لیے پرعزم ہے۔
بقائی نے مزید کہا کہ غیر قانونی پابندیوں کے خاتمے اور جوہری مسئلے کے حوالے سے ایران کی پوزیشن اور مطالبات واضح ہیں۔
انہوں نے اس امر پر تشویش کا اظہار کیا کہ حالیہ دنوں میں امریکی حکام کی جانب سے متضاد بیانات سامنے آئے ہیں، جو سنجیدگی اور نیت کے بارے میں شکوک پیدا کرتے ہیں۔ ہم توقع کرتے ہیں کہ امریکہ ان ابہامات کو دور کرے گا۔
آپ کا تبصرہ