مہر خبررساں ایجنسی کی رپورٹ کے مطابق، ایران کی وزارت خارجہ کے ترجمان اسماعیل بقائی نے صہیونی وزیر کی قیادت میں مسجد اقصی کی بے حرمتی کی شدید الفاظ میں مذمت کی۔
ترجمان نے اس اقدام کو نہ صرف مسجد اقصی کی حرمت اور اس کے مقدس اسلامی مقام کی صریح توہین قرار دیا بلکہ اقوام متحدہ کی قراردادوں کی بھی کھلی خلاف ورزی قرار دیا۔
انہوں نے کہا کہ یہ واقعہ صہیونی حکومت کے ناپاک عزائم کا عکاس ہے، جس کے تحت وہ مقبوضہ فلسطین اور پورے خطے میں مستقل کشیدگی اور بحران کو ہوا دینا چاہتی ہے۔
بقائی نے مزید کہا کہ مسجد اقصی مسلمانوں کا پہلا قبلہ ہے اور تمام مسلمانوں اور فلسطینی عوام کے نزدیک بے حد قابل احترام ہے۔ قابض صہیونی حکومت ایسی جارحانہ کارروائیوں کے ذریعے نہ صرف القدس کی اسلامی و تاریخی شناخت کو مسخ کرنا چاہتی ہے، بلکہ تمام عالم اسلام کے جذبات کو مجروح کر کے مقبوضہ فلسطین میں صورت حال کو مزید خراب کرنا چاہتی ہے۔
ترجمان نے اس بات پر بھی زور دیا کہ بیت المقدس فلسطین کا دائمی دارالحکومت ہے، اور عالمی برادری کی یہ ذمہ داری ہے کہ وہ صہیونی حکومت کو اس کے نسل پرستانہ اور مجرمانہ اقدامات سے باز رکھنے کے لیے مؤثر اقدام کرے۔
آپ کا تبصرہ