پاکستان کے صوبہ پنجاب میں طالبان کے 4 دہشت گرد ہلاک

مہر خبررساں ایجنسی نےایکسپریس کے حوالے سے نقل کیا ہے کہ پاکستان میں کاؤنٹر ٹیررازم ڈیپارٹمنٹ ( سی ٹی ڈی) نے خانیوال کے علاقے احمد ولی پل کے قریب کارروائی کے دوران وہابی دہشت گرد اور کالعدم تحریک طالبان پنجاب کے 4 دہشت گردوں کو ہلاک کر کے اسلحہ برآمد کرلیا ہے۔ اطلاعات کے مطابق سی ٹی ڈی نے خانیوال کے علاقے احمد ولی پل کے قریب وہابی دہشت گرد و کالعدم تنظیم طالبان پنجاب کے 4 مبینہ  دہشت گردوں کو ہلاک کرنے کا دعویٰ کیا ہے۔ سی ٹی ڈی حکام کا کہنا ہے کہ مصدقہ اطلاعات پر احمد ولی پل کے قریب چھاپا مارا گیا تو دہشت گردوں نے اہلکاروں پر فائرنگ کردی، جوابی فائرنگ سے 4 دہشت گرد ہلاک جب کہ ان کے 2 سے 3 ساتھی اندھیرے کا فائدہ اٹھاتے ہوئے فرار ہونے میں کامیاب ہوگئے۔سی ٹی ڈی حکام کے مطابق ہلاک ہونے والے دہشت گردوں نے ملتان میں حساس تنصیبات کو نشانہ بنانا تھا، ہلاک ہونے والے دہشت گردوں کا تعلق کالعدم تحریک طالبان پنجاب سے ہے اور ان کے قبضے سے ہینڈ گرنیڈ، رائفل اور دیگر خود کار ہتھیار بھی برآمد ہوئے ہیں۔