سعودی عرب کی سالمیت کو خطرہ ہوا تو بھرپور جواب دیں گے، پاکستانی آرمی چیف

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستانی آرمی چیف جنرل راحیل شریف کا کہنا ہے کہ اگر سعودی عرب کی سالمیت اور خودمختاری کو کسی بھی قسم کا کوئی خطرہ درپیش ہوا تو اس کا بھرپور جواب دیا جائے گا۔ آئی ایس پی آرکے مطابق پاکستانی آرمی چیف جنرل راحیل شریف نے جہلم میں ہونے والی پاک سعودی عرب مشترکہ فوجی مشقوں کی اختتامی تقریب میں شرکت کی اس موقع پر سعودی فوج کے 6 رکنی وفد نے بھی الشباب فوجی مشقوں کا معائنہ کیا۔ تقریب سے خطاب میں جنرل راحیل شریف کا کہنا تھا کہ پاکستان اور سعودی عرب میں برادرانہ تعلقات قائم ہیں اوراگر کسی بھی لمحے سعودی عرب کی سالمیت اور خودمختاری کو خطرہ لاحق ہوا تو پاک فوج مضبوط ردعمل دے گی۔ ان کا کہنا تھا کہ دونوں ممالک کے درمیان مشترکہ فوجی مشقوں سے دونوں ملکوں کی انسداد دہشت گردی کی کوششیں مزید بارآور ثابت ہوں گی اور دہشت گردی کی لعنت کو اس کی ہرشکل میں شکست دیں گے۔