امریکہ کے 400 سے زائد شہروں کو خطرہ

مہر خبررساں ایجنسی نے اسوسی ایٹڈ پریس کے حوالے سے نقل کیا ہے کہ امریکہ میں ایک نئی تحقیق میں یہ دعوی کیا گیاہے کہ سمندر کی سطح میں مسلسل اضافے کی وجہ سے امریکہ کے 400  سے زائد شہروں کو خطرہ ہے۔یہ شہر بہت جلد دنیا کے نقشے سے غائب ہو سکتے ہیں۔ نیشنل اکیڈمی آف سائنس جنرل میں شائع ہونے والی ایک تحقیق میں سائنس دانوں نے پیش گوئی کی ہے کہ اگربڑھتی ہوئی عالمی حدت اور کاربن کے اخراج پر قابو پانے کے اقدامات نہ کیے گئے اور دوہزار پچاس تک مغربی انٹارٹیکا کی برف پگھل گئی تو بیس ملین آبادی کے 414  امریکی شہرسمندرمیں ڈوب جائیں گے۔
تحقیق کے مطابق امریکی شہر نیو آرلینز اور میامی خطرے کے دائرے میں داخل ہو چکے ہیں ،جب کہ ریاست کیلی فورنیا،لوئی سینیا اور نیویارک سمیت فلوریڈا کے کئی شہر اس خطرے کی زد میں ہیں ۔