عراق میں گذشتہ ہفتہ خودکش حملے میں آسٹریلوی شہری ملوث

مہر خبررساں ایجنسی نے بی بی سی کے حوالے سے نقل کیا ہے کہ  آسٹریلیا  کے مطابق جس شخص نے گذشتہ ہفتے عراق میں خودکش حملے میں اپنے ساتھ کئی لوگوں کو ہلاک کیا وہ آسٹریلوی شہری تھا اور میلبرن کا رہنے والا تھا۔ عراق اور شام میں مغربی ممالک کے سیکڑوں سلفی وہابی دہشت گرد دہشت گردانہ کارروائیوں میں ملوث ہیں۔اس خودکش حملے میں اس نوجوان نے اپنی دھماکہ خیز مواد سے لیس بیلٹ کو دھماکے سے اڑا دیا جس میں اس کے علاوہ دوسرے تین افراد ہلاک اور متعدد زخمی ہو گئے تھے۔

عراق میں سرگرم دہشت گرد گروپ داعش نے اپنے ایک ٹوئٹر اکاؤنٹ سے اس حملے کی ذمہ داری قبول کرتے ہوئے اس نوجوان کا نام ابوبکر آسٹریلوی بتایا تھا۔آسٹریلیا کے اٹارنی جنرل جارج برانڈس نے ایک بیان میں کہا کہ یہ ’خبر پریشان کن ہے۔‘انھوں نے کہا کہ ’آسٹریلیا کی حکومت عراق اور شام میں داعش کی پرتشدد کارروائیوں کی مذمت کرتی ہے اور ان سرگرمیوں میں کسی بھی آسٹریلوی باشندے کی شمولیت پر گہری تشویش کا اظہار کرتی ہے

اس نے کہا کہ ان میں آسٹریلیا کے باشندوں کا شامل ہونا آسٹریلیا کی اندرونی سلامتی کے لیے خطرہ ہے کیونکہ ان میں شامل لوگ ملک واپسی پر کہیں یہاں بھی تشدد پر آمادہ نہ ہو جائیں۔اس بیان میں کہا گیا ہے کہ جمعرات کو خود کش حملے میں شامل بمبار عراق اور شام کے تصادم میں ہلاک ہونے والا دوسرا آسٹریلوی خودکش بمبار تھا۔ مغربی ممالک ایک طرف سلفی وہابی دہشت گردوں کی حمایت کررہے ہیں اور دوسری طرف ان کے وحشیانہ اقدامات کی مذمت بھی کررہے ہیں اور مغربی ممالک کی اسی دوگانہ پالیسی کی وجہ سےدہشت گردی کو فروغ مل رہا ہے۔ بعض ذرائع کے مطابق امریکہ اور مغربی ممالک جان بوجھ کر اسلامی ممالک میں دہشت گردوں کی حمایت کررہے ہیں۔