افغانستان میں امریکی ایف 16طیارہ گر کر تباہ

مہر خبررساں ایجنسی نے رائٹرز کے حوالے سے نقل کیا ہے کہ افغانستان کے بگرام ایئربیس سے اڑان بھرنے کے بعد قریب ہی میں امریکی ایف 16طیارہ گر کر تباہ ہوگیا جبکہ پائلٹ کود کر جان بچانے میں کامیاب ہوگیا۔  پینٹاگون کے پریس سیکریٹری پیٹر کک کے مطابق اتحادی افواج نے پائلٹ کواپنی تحویل میں لے کر ہسپتال منتقل کردیاجہاں طبی امدادجاری ہے ۔ بیان کے مطابق حادثہ منگل کی شام ساڑھے چا ربجے پیش آیا جس کے بعد اتحادی افواج نے جائے حادثہ کو گھیرے میں لے لیا۔
پیٹرکک کا کہنا ہے کہ حادثے کی وجہ معلوم نہیں ہوسکی ،اس ضمن میں تحقیقات جاری ہیں تاہم کسی حملے کی تردید کی ۔ واضح رہے کہ بگرام ایئربیس امریکی فوج کا افغانستان میں سب بڑا بیس کیمپ ہے جو دارلحکومت کابل سے شمال مشرق میں واقع ہے جبکہ اعدادوشمار کے مطابق9800امریکی فوجی تاحال افغانستان میں موجود ہیں۔