پرامن جوہری ٹیکنالوجی ایران کا حق، امریکہ نے سفارت کاری کو نقصان پہنچایا، چین

مہر خبررساں ایجنسی کی رپورٹ کے مطابق، اقوام متحدہ کی سلامتی کونسل کے اجلاس میں چین کے نمائندے نے واضح طور پر کہا کہ ایران کو پرامن جوہری توانائی کے استعمال کا حق حاصل ہے۔

انہوں نے اسرائیل اور امریکہ کی جانب سے ایران کی جوہری تنصیبات پر حملوں کو عالمی امن کے لیے سنگین خطرہ قرار دیا اور کہا کہ ان حملوں کی وجہ سے سلامتی کونسل کی قرارداد 2231 پر عملدرآمد مشکل ہو گیا ہے۔

چینی نمائندے نے مزید کہا کہ کچھ رکن ممالک صرف ایران کو موردِ الزام ٹھہراتے رہے۔ بحران کی ابتداء امریکہ نے کی، جس نے 2018 میں جوہری معاہدے سے دستبرداری اختیار کی اور زیادہ سے زیادہ دباؤ کی مہم شروع کی۔ اس رویے نے سفارتی عمل کو نقصان پہنچایا، جبکہ ایران اپنی ذمہ داریاں نبھا رہا ہے اور بارہا واضح کر چکا ہے کہ وہ ایٹمی ہتھیاروں کے پیچھے نہیں ہے۔

انہوں نے زور دیا کہ ہماری اولین ترجیح جھڑپوں کا خاتمہ ہے، طاقت کا استعمال حل نہیں۔ ایک پائیدار جنگ بندی اور سیاسی حکمت عملی ہی مسائل کا راستہ ہے۔