مہر خبررساں ایجنسی کے مطابق، ایران میں صدر رئیسی کی شہادت کے بعد صدارتی انتخابات کے حوالے سے ریاست کے تینوں اہم اداروں کے سربراہان کا اجلاس ہوا جس میں صدارتی انتخابات کے لئے ماحول سازی پر اتفاق کیا گیا۔
مجریہ، مقننہ اور عدلیہ کے سربراہان کے علاوہ نگران کونسل کے نائب سربراہ، وزیرداخلہ اور صدر کے قانونی امور کے معاون بھی اجلاس میں شریک ہوئے۔
اجلاس کے دوران آئین کے مطابق صدارتی انتخابات کے طریقہ کار پر غور کیا گیا اور انتخابات کے تمام مراحل کو بروقت اور شفاف طریقے سے انجام دینے پر اتفاق کیا گیا۔
اجلاس کے دوران صدارتی امیدواروں کی شرائط پر نظرثانی کی گئی تاکہ فقط شرائط کے حامل افراد ہی رجسٹریشن کراسکیں۔
اجلاس کے دوران مختلف صوبوں کے گورنروں کو انتخابی ماحول پیدا کرنے کے لئے مزید فعال بنانے کا فیصلہ کیا گیا تاکہ عوام کی زیادہ سے زیادہ شرکت کو یقینی بنایا جاسکے۔
آپ کا تبصرہ