پنجاب یونیورسٹی میں طلباء کے دو گروہوں کے درمیان تصادم میں5 طلباء زخمی

مہر خبررساں ایجنسی نے ڈان کے حوالے سے نقل کیا ہے کہ پاکستان کی پنجاب یونیورسٹی میں ثقافتی پروگرام کے دوران طلبا کے 2 گروہوں میں ہونے والے تصادم میں 5 طالب علم زخمی ہوگئےہیں۔ اطلاعات کے مطابق جامعہ پنجاب میں طلبا کے ایک گروپ کی جانب سے ثقافتی پروگرام کا انعقاد کیا گیا تھا، تقریب کے دوران دوسری تنظیم کے طالب علموں نے دھاوا بولتے ہوئے ڈنڈے اور پتھر برسانے کا سلسلہ شروع کردیا۔طلبہ میں بڑھتے ہوئے تصادم کو دیکھتے ہوئے پولیس نے جامعہ پنجاب میں مزید نفری طلب کی،تاہم دونوں گروہوں کی جانب سے ایک دوسرے پر پتھراو اور ڈنڈوں سے حملوں کو سلسلہ جاری رہا۔ مشتعل طلبا نے نہ صرف تقریب کے لیے لگائے گئے ٹینٹ اکھاڑ دیئے بلکہ متعدد کیمپس کو نذرِ آتش کردیا۔پولیس نے آنسو گیس کی شیلنگ کے ذریعے مشتعل طلبہ کو قابو کیا، جب فوری طور پر کسی کے گرفتار کیے جانے کی اطلاع موصول نہیں ہوئی۔تصادم کے نتیجے میں 5 طلبہ زخمی ہوئے، جنہیں ہسپتال منتقل کردیا گیا ہے۔