ہندوستان میں تیندوے کے حملے میں 10 افراد زخمی

مہر خبررساں ایجنسی نے ہندوستانی ذرائع کے حوالے سے نقل کیا ہے کہ ہندوستان کی ریاست اتر پردیش کے گاؤں میں ایک تندوے نے گھس کر 10 افراد کو زخمی کردیا ہے زخمیوں میں تین سالہ بچہ بھی شامل ہے۔اطلاعات کے مطابق بپھرا ہوا تیندوا پورے گاؤں میں دوڑتا رہا اور اس نے راہ میں آنے والے 10 سے زائد افراد کو شدید زخمی کردیا جن میں ایک 3 سالہ بچہ بھی شامل ہے۔ اس واقعہ کی ڈرامائی فوٹیج پوری دنیا میں مقبول ہورہی ہے۔ ویڈیو میں دیکھا جاسکتا ہے کہ پہلے تیندوے نے 2 افراد پر حملہ کیا اور اس کے بعد ایک گھر میں گھس گیا اور جب تیندوے کو وہاں سے بھگایا گیا تو باہر نکلتے ہوئے اس نے ایک اور دیہاتی کو زخمی کردیا۔ یہ تیندوا ایک گھر میں گھاس کے ڈھیر میں چھپا تھا جہاں پہلے وہ دو بے خبر خواتین پر حملہ کرکے وہاں سے فرار ہوا تھا۔ ویڈیو میں تیندوے کو ایک جامنی قمیض پہنے شخص پر حملہ کرتے ہوئے بھی دیکھا جاسکتا ہے۔ اس پورے واقعہ میں 2 پولیس اہلکاروں سمیت 10 افراد شدید زخمی ہوگئے ہیں۔