نیو کراچی میں سلینڈر کے دھماکے سے 5 افراد ہلاک

مہر خبررساں ایجنسی نے پاکستانی ذرائع کے حوالے سے نقل کیا ہے کہ نیو کراچی میں سلینڈر کے دھماکے سے برف خانے کی چھت گر گئی جس کے نتیجے میں 5 افراد جاں بحق ہوگئے ہیں۔ اطلاعات کے مطابق حادثہ بوائلر پھٹنے سے پیش آیا۔ ملبے تلے دبے افراد کو نکالنے کیلئے ریسکیو ٹیموں کا آپریشن جاری ہے، زخمیوں کو اسپتال منتقل کر دیا گیا۔
 ذرائع کے مطابق نیو کراچی کے علاقے میں قائم ایک برف خانے میں نصب بوائلر زور دار دھماکے سے پھٹ گیا جس سے فیکٹری مکمل طور پر تباہ ہوگئی۔ دھماکہ اس قدر شدید تھا کہ اس سے فیکٹری کی دیواریں اور چھت مکمل طور پر تباہ ہوگئی اور متعدد افراد ملبے تلے دب گئے جبکہ ساتھ والی فیکٹری کو بھی نقصان پہنچا۔ ریسکیو ذرائع کے مطابق حادثے کے وقت 10 سے زائد افراد فیکٹری میں موجود تھے جن کے ملبے تلے دبے ہونے کا امکان ہے۔