مہر خبررساں ایجنسی کی رپورٹ کے مطابق، ایران اور امریکہ و صہیونی حکومت کے درمیان عارضی جنگ بندی کے باوجود دارالحکومت بیروت سمیت لبنان کے مختلف علاقوں پر غاصب صہیونی فوج نے شدید فضائی حملے کیے ہیں۔
تفصیلات کے مطابق، بیروت اور بقاع سمیت جنوبی لبنان کے مختلف علاقوں کے متعدد شہروں میں شہری آبادی کو نشانہ بنایا گیا ہے۔ حملوں کے نتیجے میں بڑے پیمانے پر جانی نقصان کی اطلاعات سامنے آئی ہیں۔
لبنانی وزیر صحت کے مطابق اسرائیلی فضائی حملوں کے نتیجے میں ملک بھر میں درجنوں افراد شہید اور سینکڑوں زخمی ہوچکے ہیں جبکہ اسپتال زخمیوں اور شہدا سے بھر گئے ہیں۔ لبنانی ریڈ کراس نے بھی بڑی تعداد میں شہادتوں کی تصدیق کی ہے۔
رپورٹس کے مطابق مشرقی لبنان کے علاقے بقاع میں رہائشی علاقوں پر شدید بمباری کی گئی۔ بقاع کے قصبے شمسطار میں حملے کے نتیجے میں کم از کم 10 افراد شہید اور درجنوں زخمی ہوئے جبکہ ایک جنازے کی تقریب کو بھی نشانہ بنایا گیا۔
اسی طرح مغربی بیروت کے علاقوں برج ابی حیدر، المنارہ، عین التینہ اور بربور پر بھی فضائی حملے کیے گئے جبکہ بیروت کے مضافاتی علاقے الضاحیہ کے محلوں بئر حسن، حارہ حریک، الشیاح، السلم اور الرہاتب کو شدید بمباری کا سامنا کرنا پڑا۔
المیادین کے نمائندے کے مطابق جنوبی لبنان کے قصبے عربصالیم کو بھی اسرائیلی حملوں کا نشانہ بنایا گیا جہاں اس تازہ کارروائی میں کئی افراد شہید اور متعدد زخمی ہوئے۔
جبل لبنان کے قصبے کیفون میں بھی شہریوں کے قتل عام کی اطلاعات ہیں جبکہ بقاع کے قصبے دورس میں ایک رہائشی اپارٹمنٹ پر بمباری کے نتیجے میں 2 افراد شہید اور 11 زخمی ہوگئے۔
ادھر جنوبی لبنان کے شہر صیدا میں اسرائیلی حملے کے نتیجے میں 6 افراد شہید اور 25 سے زائد زخمی ہونے کی اطلاعات بھی ہیں۔
آپ کا تبصرہ