مہر خبررساں ایجنسی کے مطابق، الجزائر کی وزارت خارجہ نے اعلان کیا ہے کہ فرانسیسی سفارت خانے کے 12 اہلکاروں کو ناپسندیدہ شخصیت قرار دے کر 48 گھنٹوں کے اندر ملک چھوڑنے کا حکم دیا گیا ہے۔
وزارت خارجہ نے واضح کیا کہ یہ فیصلہ فرانس کی حکومت کے اس توہین آمیز اقدام کے جواب میں کیا گیا ہے جس کے تحت فرانس میں الجزائری قونصل خانے کے ایک ملازم کو حراست میں لیا گیا تھا۔
الجزائر نے اپنے بیان میں خبردار کیا ہے کہ الجزائر کی خودمختاری پر کسی بھی قسم کی دست درازی کی جائے تو اس کا سخت اور مناسب جواب دیا جائے گا۔
فرانسیسی اخبار لو فیگارو کی ایک رپورٹ کے مطابق الجزائر نے ان اہلکاروں کو ملک چھوڑنے کے لیے 48 گھنٹے کا وقت دیا ہے۔ یہ اقدام 1962 میں الجزائر کی آزادی کے بعد سے اب تک کا ایک بے مثال واقعہ ہے۔
واضح رہے کہ الجزائر نے حالیہ ہفتے کے آغاز میں پیرس حکومت کے اس فیصلے پر شدید احتجاج کیا تھا جس کے تحت الجزائری قونصل خانے کے ایک اہلکار کو تفتیش کے لیے حراست میں لیا گیا۔
آپ کا تبصرہ