غزہ میں جنگ بندی کے لیے ثالث ممالک کی تجویز سے حماس کا اتفاق

مہر خبررساں ایجنسی کے مطابق، غزہ میں حماس اور صہیونی حکومت کے درمیان جنگ بندی کے لیے کوششیں جاری ہیں۔ ثالث ممالک کی جانب سے پیش کردہ جنگ بندی منصوبے کی تفصیلات سامنے آچکی ہیں، جسے حماس نے قبول کر لیا تھا۔

تفصیلات کے مطابق ثالث ممالک نے یہ تجویز 27 مارچ کو پیش کی گئی تھی اور حماس نے اس پر اپنی رضامندی ظاہر کی تھی۔

الجزیرہ ٹی وی نے اس حوالے سے کہا ہے کہ مذکورہ منصوبے کے تحت حماس نے 50 دن کے اندر 5 اسرائیلی قیدی فوجیوں کو رہا کرنے پر اتفاق کیا ہے۔ اس کے بدلے میں 2000 فلسطینی قیدیوں کو بھی رہا کیا جائے گا۔

یہ تجویز 2 مارچ سے پہلے کی صورتحال کو بحال کرنے، بارڈر کراسنگز کو دوبارہ کھولنے اور انسانی ہمدردی کے پروٹوکول پر عمل درآمد کو یقینی بنانے کی شرائط پر مشتمل ہے۔

اس کے علاوہ ثالث ممالک نے اس 50 روزہ مدت کے دوران فوری مذاکرات شروع کرنے کی ضمانت دی ہے، تاکہ مستقل جنگ بندی، اسرائیلی افواج کا مکمل انخلا اور جنگ کے بعد کے انتظامات پر اتفاق کیا جاسکے۔