مہر خبررساں ایجنسی کے مطابق، فلسطینی ذرائع ابلاغ نے کہا ہے کہ صہیونی فوج کی جانب سے غرب اردن کے قصبے طول کرم پر حملے کے بعد فلسطینی مجاہدین نے جوابی کاروائی کرتے ہوئے دشمن کو شدید نقصان پہنچایا ہے۔
فلسطین الیوم نے کہا ہے کہ طولکرم اور نورشمس کیمپ کے اطراف میں فریقین کے درمیان گھمسان کی جنگ ہوئی ہے جس میں مجاہدین نے کئی صہیونی فوجیوں کو ہلاک اور متعدد کو زخمی کردیا ہے۔
مجاہدین نے اسرائیلی فوج کی کئی گاڑیوں کو نقصان پہنچایا۔ فلسطینی جوانوں نے سڑکوں پر رکاوٹیں کھڑی کرنے کے لئے ٹائروں کو آگ لگادی جس سے صہیونی گاڑیوں کی رفت و آمد متاثر ہوئی اور دھوئیں کی وجہ سے فضاوں سے جاسوسی کرنے والے ڈرون طیاروں کو مشکلات پیش آئیں۔
دوسری جانب غزہ سے موصولہ اطلاعات کے مطابق کئی قصبوں میں صہیونی فوجیوں پر مجاہدین نے حملہ کیا ہے جس کے نتیجے میں کئی صہیونی فوج ہلاک اور متعدد زخمی ہوگئے ہیں۔
عبرانی میڈیا نے اسرائیلی فوج کے حوالے سے کہا ہے کہ غزہ میں زمینی تصادم کے دوران کئی فوجی ہلاک ہوگئے ہیں۔ یہ واقعات غزہ کے مرکز اور جنوب میں پیش آئے۔
اسی طرح صہیونی فوج نے کہا ہے کہ جھڑپوں کے دوران چھے فوجی زخمی ہوگئے ہیں جن میں سے بعض کی حالت تشویشناک ہے۔
آپ کا تبصرہ