ہمارے نئے کمانڈر شہید کمانڈروں کے نقش قدم پر چلنے والے لائق افراد ہیں، قالیباف

مہر خبررساں ایجنسی کی رپورٹ کے مطابق، ایرانی پارلیمنٹ کے سربراہ محمدباقر قالیباف نےصہیونی حکومت کے ساتھ حالیہ 12 روزہ جنگ میں رہبر انقلاب اسلامی کے انتہائی اہم کردار کی قدردانی کرتے ہوئے کہا کہ دشمن کے اچانک حملے کے بعد فوج وقتی طور پر ایک صدمے میں تھی، لیکن رہبر معظم نے صرف چند گھنٹوں میں فوج کو سنبھالا دیا اور براہ راست جنگی مرکز میں جا کر فوجی کمانڈروں کی رہنمائی کی۔

قالیباف نے کہا کہ جس طرح 1980ء کی جنگ کے دوران رہبر معظم جنگی فیصلے کرتے تھے، اسی طرح اس بار بھی انہوں نے خود موجود رہ کر رہنمائی فرمائی۔

انہوں نے بتایا کہ دشمن کے حملے کے صرف 17 گھنٹے بعد ایران نے 150 میزائل صہیونی علاقوں پر فائر کیے جس کے نتیجے میں صہیونی فوجی مراکز اور ان کا دفاعی نظام تباہ ہوگیا۔

قالیباف نے کہا کہ یہ جنگ ہمارے لیے ایک عملی تجربہ بھی ثابت ہوئی جس میں ہم نے اپنے میزائل سسٹم کو آزمایا۔ جنگ کے دوران ہمارے منصوبے مسلسل اپڈیٹ ہوتے رہے۔

انہوں نے مزید کہا کہ صہیونی ذرائع کے مطابق اس جنگ میں ان کے 3,520 فوجی زخمی ہوئے۔ اس تعداد سے اندازہ ہوتا ہے کہ ہلاکتیں 500 سے زیادہ ہوسکتی ہیں۔

قالیباف نے کہا کہ ہمارے نئے کمانڈر شہید کمانڈروں کے نقش قدم پر چلنے والے لائق افراد ہیں، جنہوں نے بہت جلد میدان سنبھالا۔