مہر خبررساں ایجنسی کی رپورٹ کے مطابق، ایرانی وزارت خارجہ کے ترجمان ناصر کنعانی نے کویت کے امیر کے دورہ عرب امارات کے بعد جاری بیان کو مسترد کرتے ہوئے کہا ہے کہ ایرانی جزائر پر کسی کا دعوی ہرگز قبول نہیں کیا جائے گا۔
انہوں نے کہا کہ خلیج فارس میں واقع جزائر ابوموسی، تنب بزرگ اور تنب کوچک ایران کا حصہ ہیں جس سے کوئی انکار نہیں کرسکتا۔ عرب امارات اور کویتی اعلی حکام کے مشترکہ بیان ایران کے اندرونی معاملات میں مداخلت ہے جس کی سیاسی اور سفارتی سطح پر کوئی حیثیت نہیں ہے۔
انہوں نے کہا کہ ایران اپنی جغرافیائی حدود پر کسی قسم کے مذاکرات کے تیار نہیں ہے۔ کویت کی جانب سے آرش گیس فیلڈ پر بھی یکطرفہ دعوی کسی حیثیت کا حامل نہیں ہے۔
کنعانی نے ایران اور کویت کے درمیان ہونے والے مذاکرات کی طرف اشارہ کرتے ہوئے کہا کہ مسئلے کا بہترین حل فریقین کے درمیان مذاکرات اور درمیان راستہ نکالنا ہے۔ ایران کویت کے ساتھ دوطرفہ معاملات پر گفتگو کرنے کے لئے مکمل آمادہ ہے۔
آپ کا تبصرہ