مہر خبررساں ایجنسی کی رپورٹ کے مطابق، ایران کے سیاہکل نامی شہر میں امام جعفر صادق علیہ السلام کی شہادت کی مناسبت سے منعقدہ مجلس عزاء سے خطاب میں آیت اللہ رضا رمضانی نے کہا کہ امام صادق (ع) نے طویل مدت تک امت کی امامت کا عہدہ سنبھالا اور آنحضرت علیہ السلام کا ایک اہم فریضہ ہمیں اہل بیت (ع) کی نورانی تعلیمات سے آشنا کرانا تھا۔
انہوں نے کہا کہ امام جعفر صادق علیہ السّلام نے تقریباً 4 ہزار علمی شخصیات کی تربیت فرمائی، کیونکہ آپ علیہ السلام کے اہم اقدامات میں سے ایک معاشرے میں موجود فکری اور اخلاقی انحرافات سے مقابلہ کرنا تھا۔
مجمع جہانی اہل بیت علیہم السلام کے سربراہ نے مزید کہا کہ ہمیں آئمہ اطہار علیہم السلام کی علمی اور عملی زندگی سے آشنا ہونا چاہیئے اور اپنے طرزِ عمل سے لوگوں کو ان کی عظیم زندگیوں سے آشنا کرانا چاہیئے۔
آیت اللہ رمضانی نے مکتب امام صادق علیہ السلام کے سعادت پر مشتمل دروس کا ذکر کرتے ہوئے کہا کہ ہمیں لوگوں کے ساتھ رہن سہن اور برتاؤ میں ان کے وقار کا خیال رکھنا چاہیئے اور خود کو دوسروں سے برتر اور افضل نہیں سمجھنا چاہیئے۔
انہوں نے مکتب امام صادق علیہ السلام کی توقعات کی جانب اشارہ کرتے ہوئے مزید کہا کہ کچھ لوگ غیبت، جھوٹ وغیرہ سے دنیا میں ہی اپنے نیک اعمال کو باطل کر دیتے ہیں۔
آپ کا تبصرہ