اتر پردیش میں اسکول بس اور ٹرک میں تصادم کے نتیجے میں کم از کم 13 طلبا ہلاک

مہر خبررسان ایجنسی نے ہندوستانی ذرائع کے حوالے سے نقل کیا ہے کہ ہندوستانی ریاست اتر پردیش میں اسکول بس اور ٹرک میں خوفناک تصادم کے نتیجے میں کم از کم 13 طلبا ہلاک جب کہ 40 سے زائد زخمی ہو گئے ہیں۔ اطلاعات کے مطابق اسکول بس  ہندوستانی شہر دیواریہ سے نئی دہلی جا رہی تھی کہ ریاست اتر پردیش کے ضلع اتاہ میں ٹرک سے ٹکرا گئی جس کے نتیجے میں کم از کم 13 طلبا ہلاک اور 40 سے زائد زخمی ہو گئے۔ ذرائع کے مطابق حادثے کی اصل وجہ تاحال معلوم نہیں ہو سکی ہے تاہم ابتدائی طور پر حادثے کی وجہ دھند معلوم ہوتی ہے۔ حکام کے مطابق ہلاک ہونے والوں میں اسکول بس کا ڈرائیور بھی شامل ہے جب کہ زخمی بچوں کو طبی امداد کے لئے مختلف اسپتالوں میں منتقل کر دیا گیا ہے جہاں متعدد طلبا کی حالت تشویشناک ہونے کے باعث ہلاکتوں میں اضافہ کا خدشہ ہے۔