اسرائیل زوال کی طرف تیزی سے بڑھ رہا ہے، صیہونی جنرل کا اعتراف

مہر خبررساں ایجنسی نے المیادین نیوز کے حوالے سے بتایا ہے کہ صیہونی ریزرو فوج کے جنرل "اسحاق بریک" نے اس حکومت کے موجودہ عہدیداروں کا حوالہ دیتے ہوئے کہا: جب تک اسرائیل اپنی سب سے بڑی تباہی کے اسباب کو تبدیل نہیں کرتا تب تک وہ ایک یقینی زوال کی طرف ہی بڑھتا رہے گا۔

انہوں نے مزید کہا: غزہ جنگ کو ختم نہ کرنے کے نیتن یاہو، گیلنٹ اور ہالیوی کے منصوبے کا مطلب یہ ہے کہ ایک ہمہ گیر علاقائی جنگ ناگزیر ہو جائے گی، ایک ایسی جنگ جس کے لیے ہم بالکل بھی تیار نہیں ہیں۔

اس صہیونی جنرل نے مزید کہا: جو لوگ رفح اور حزب اللہ پر حملہ کرنے کے لیے دباؤ ڈال رہے ہیں انہیں اس بات کا اندازہ نہیں ہے کہ یہ حملے اسرائیل پر کیا تباہی لا سکتے ہیں۔

اسحاق بریک نے کہا: ہم تیزی سے دنیا کی تمام اقوام سے کٹ رہے ہیں شدید تنہائی کی طرف بڑھ رہے ہیں، یہاں تک کہ یورپی ممالک اور باقی دنیا بھی ہمارے اوپر ہتھیاروں کی پابندی عائد کرے گی۔

انہوں نے مزید کہا: اسرائیل کی داخلی سلامتی تباہ ہو رہی ہے اور ہم روز بروز غزہ کے قبرستان میں مزید دھنستے جا رہے ہیں۔