داعش نےمغربی موصل سے فرار ہونے والے 163 افراد کو قتل کردیا

مہر خبررساں ایجنسی نے غیر ملکی ذرائع کے حوالے سے نقل کیا ہے کہ اقوام متحدہ کے انسانی حقوق ہائی کمشنر نے دعویٰ کیا ہے کہ عراق کے شہر موصل کے مغربی حصے میں وہابی دہشت گرد تنظیم داعش نے یکم جون سے اب تک جان بچا کر فرار ہونے کی کوشش کرنے والے 163 شہریوں کو موت کے گھاٹ اتار دیا ہے۔اطلاعات کے مطابق کے مطابق جنیوا میں انسانی حقوق کونسل کے اجلاس سے خطاب میں انسانی حقوق ہائی کمشنر زید رعد الحسین نے کہا کہ گذشتہ پانچ روز کے دوران داعش نے مغربی موصل سے فرار ہونے کی کوشش کرنے والے 163 شہریوں کو پکڑ کر قتل کر دیا۔انہوں نے بتایاکہ مغربی موصل کی الشفا کالونی اور اس کی سڑکوں پر لڑائی کے دوران ہلاک ہونے والے مردو خواتین اور بچوں کی لاشیں بکھری پڑی ہیں۔ ان میں 163 شہریوں کی لاشیں بھی ہیں جنہیں داعش نے فرار ہونے کی کوشش کے دوران گولیاں مار کر قتل کر دیا تھا۔