ہندوستان میں تعینات پاکستانی ہائی کمشنر کو تبدیل کرنے کا فیصلہ

مہر خبررساں ایجنسی نے ایکسپریس کے حوالے سے نقل کیا ہے کہ ہندوستان میں تعینات پاکستانی ہائی کمشنر عبدالباسط سمیت مختلف ممالک میں تعینات پاکستانی سفیروں کو تبدیل کرنے کا فیصلہ کیا گیا ہے۔ ذرائع کے مطابق ہندوستان میں تعینات پاکستانی ہائی کمشنر عبدالباسط کو تبدیل کر کے ترکی میں موجود سفیر سہیل محمود کو ہندوستان میں ہائی کمشنر تعینات کرنے کا فیصلہ کیا گیا ہے۔ وزارت خارجہ کے ایڈیشنل سیکریٹری ایڈمن افتخار عزیز کو ترکی میں سفیر تعینات کیا جائے گا۔ ذرائع کے مطابق برازیل میں موجود سفیر برہان الاسلام رواں برس ریٹائر ہو رہے ہیں اور ان کی جگہ جنوبی افریقہ میں موجود نجم الثاقب کو برازیل میں سفیر لگایا جا رہا ہے جب کہ تھائی لینڈ میں سفیر ڈاکٹر سہیل خان کو ساوتھ افریقہ بھیجنے کا فیصلہ کیا گیا ہے۔ ڈنمارک میں موجود سفیر مسرور احمد جونیجو جون میں ریٹائر ہو رہے ہیں جن کے متبادل کے طور پر ایڈیشنل سیکرٹری ایشیا پیسفک ذوالفقار گردیزی کو سفیر تعینات کیا جا رہا ہے۔