مہر خبررساں ایجنسی کی رپورٹ کے مطابق، معروف عرب تجزیہ نگار عبدالباری عطوان نے اپنے تازہ مضمون میں روزنامہ ’’رأی الیوم‘‘ میں لکھا ہے کہ تمام شواہد اس بات کی نشاندہی کرتے ہیں کہ انقلابِ اسلامی ایران امریکہ کی جانب سے کسی نئے فوجی حملے کا انتظار نہیں کرے گا کہ اس کے بعد فوجی جواب دیا جائے، بلکہ ایران اس سے پہلے ہی دشمن کی جارحیت کا جواب وسیع پیمانے پر میزائل اور ڈرون حملوں کے ذریعے دے گا۔
یہ ایسے وقت میں ہو رہا ہے جب واشنگٹن ایران کا مکمل اقتصادی اور معاشی محاصرہ کرکے اسے تھکاوٹ اور فرسودگی کی آخری حد تک پہنچانا چاہتا ہے۔ امریکی حکام یہ خام خیالی پالے ہوئے ہیں کہ اس طرح وہ نظام کو اندر سے کمزور کر سکتے ہیں اور عوامی بغاوت کو ہوا دے کر اسے گرا سکتے ہیں۔
عطوان نے پیشگی حملے کی نئی ایرانی حکمتِ عملی کے دو بنیادی شواہد کی جانب اشارہ کرتے ہوئے لکھا:
پہلا ثبوت: آئل ٹینکروں پر حملوں میں اضافہ، خواہ میزائلوں کے ذریعے ہو یا سمندری بارودی سرنگیں بچھا کر، جو جنوبی سمندری راستے میں ’’غیر قانونی‘‘ قرار دیے جانے والے راستے سے گزرنے والے جہازوں کو نشانہ بنا رہی ہیں۔ اسی طرح انتہائی جدید ایرانی میزائلوں کے ذریعے امریکی ڈرونز کو مار گرایا جا رہا ہے۔ صورتِ حال یہ ہے کہ اب کوئی دن ایسا نہیں گزرتا جب متعدد آئل ٹینکروں کو تباہ یا نذرِ آتش نہ کیا جاتا ہو۔
دوسرا ثبوت: یمن کی تحریک انصاراللہ کی بڑی کامیابیاں ہیں، جو ’’میدانوں کے اتحاد‘‘ کی حکمتِ عملی کو فعال بنانے کے تناظر میں سامنے آ رہی ہیں۔ ان پیش قدمیوں میں یمنی فورسز کی جنوب کی جانب پیش رفت، ذوباب ایئرپورٹ اور تعز شہر کے مغرب میں واقع باب المندب کے علاقے پر قبضہ شامل ہے۔ اس تحریک کے جنگجو اب عدن شہر سے صرف چند میل کے فاصلے پر رہ گئے ہیں، جو یمن میں سعودی عرب کی حمایت یافتہ اور اس کے زیرِ سرپرستی قائم حکومت کا دارالحکومت ہے، جسے سعودی عرب اور خلیجی ممالک کی پشت پناہی حاصل ہے۔
عطوان نے اس کامیابی کی سب سے اہم علامت یمن میں فوجی اتحاد کے کمانڈر کی برطرفی کو قرار دیا اور اس بات پر زور دیا کہ انصاراللہ نے تقریباً پورے مغربی ساحلی علاقے اور بحیرۂ احمر کے داخلی راستے پر واقع باب المندب آبنائے کا مکمل کنٹرول حاصل کر لیا ہے اور اس علاقے اور عدن کے درمیان مواصلاتی راستہ منقطع کر دیا ہے۔
عطوان نے اس بات کی طرف اشارہ کرتے ہوئے کہ ایران، کیوبا اور وینزویلا کی طرح نہیں ہے کہ امریکی دباؤ کے سامنے تسلیم ہو جائے، واضح کیا کہ ایران نے تمام جنگوں میں استقامت کا مظاہرہ کیا ہے اور وہ کبھی ہتھیار نہیں ڈالے گا۔ امریکی طیارہ بردار بحری جہاز، خواہ ان کی تعداد تین ہو اور ان کے ساتھ 20 سے زائد دیگر جنگی بحری جہاز بھی ہوں، ایران کو خوف زدہ نہیں کر سکتے؛ کیونکہ ایرانی خودکش بحری جہاز حملے کا حکم ملنے کے انتظار میں ہیں۔
عرب تجزیہ نگار مزید لکھتے ہیں کہ اگر یمنی میزائل دو امریکی طیارہ بردار بحری جہازوں ’’لنکن‘‘ اور ’’فورڈ‘‘ کو نشانہ بنانے اور انہیں ناکارہ کرنے میں کامیاب ہو چکے ہیں اور ٹرمپ کو انصاراللہ کے ساتھ جنگ بندی کے لیے منت سماجت کرنے پر مجبور کر چکے ہیں تو ایران یقیناً یہ کام کرنے کی صلاحیت رکھتا ہے۔
مذاکرات کا عمل روکنے میں ایران کی دانش مندی
عطوان نے مذاکرات روکنے اور خود کو ثالث کہنے والے فریقوں کے لیے ایران کے دروازے بند کرنے کے فیصلے کا ذکر کرتے ہوئے کہا کہ گزشتہ آٹھ ماہ کے دوران ان افراد کے مسلسل دوروں نے یہ جھوٹا تاثر پیدا کیا کہ امن مذاکرات میں پیش رفت ہو رہی ہے۔ یہ سلسلہ دراصل جنگ کو طول دینے اور امریکہ کے جارحانہ و پوشیدہ عزائم پر پردہ ڈالنے کی امریکی حکمتِ عملی کی خدمت کر رہا ہے۔
انہوں نے مزید کہا کہ یہ وہی شیطانی حکمتِ عملی ہے جو افسوس ناک طور پر غزہ میں بھی انہی ثالثوں کے ذریعے کامیاب ہوئی۔ غزہ میں اس وقت جو کچھ ہو رہا ہے، یعنی جنگ کا جاری رہنا، بھوک کے ذریعے نسل کشی اور تباہی کا سلسلہ برقرار رہنا، اس دعوے کا واضح ثبوت ہے۔
عطوان نے واضح کیا کہ وہ اس جارحانہ جنگ کے دونوں محاذوں، یعنی اسرائیل اور امریکہ کے خلاف، ایران کی غیر معمولی دانش مندی اور انتہائی کامیاب حکمتِ عملی کو سمجھتے ہیں۔ وہ یہ بھی جانتے ہیں کہ تہران کے حکام مذاکرات کی میز پر واپس آنے سے پہلے اپنی سات شرائط پر مکمل عمل درآمد کے لیے کیوں اصرار کر رہے ہیں اور ان ’’ثالثوں‘‘ کی میزبانی کرکے اپنا وقت ضائع کیوں نہیں کرنا چاہتے۔
انہوں نے مزید کہا کہ ٹرمپ شکست کھا چکے ہیں اور انہوں نے ایران کی ثابت قدمی اور استقامت کا اعتراف کیا ہے، جو اس شکست کا سب سے بڑا سبب ہے۔ یہی بات نیتن یاہو کے بارے میں بھی درست ہے، جس نے اسرائیل کو دنیا کی سب سے زیادہ نفرت اور تنہائی کا شکار حکومت بنا دیا ہے۔ نیتن یاہو جن سات محاذوں پر جنگ لڑنے کا دعویٰ کرتا تھا، اسرائیل ان تمام محاذوں پر شکست کھا چکا ہے۔
مضمون کے اختتام پر کہا گیا ہے کہ ایران اب خطے کی تبدیلیوں کی قیادت کرنے کی پوزیشن میں آ چکا ہے اور علاقائی سطح پر ایک بڑی طاقت بن چکا ہے، جس کے ساتھ دوسرے فریق ٹکراؤ سے خوف محسوس کرتے ہیں۔
عطوان نے اس امکان کو بعید قرار دیا کہ ٹرمپ، جو انتخابات میں شکست کے باعث اپنی داخلی اور عوامی حیثیت و مقبولیت کھو چکے ہیں، دوبارہ ایران پر حملہ کرنے کی جرأت کریں گے۔ لہٰذا بحیرۂ عرب میں تیسرے طیارہ بردار بحری جہاز کی تعیناتی شاید محض ایک نمائشی، شور و غوغا سے بھرپور اور مایوسی پر مبنی کوشش سے زیادہ کچھ نہیں، جس کی ایسی مثالیں ہم گزشتہ آٹھ ماہ کے دوران بارہا دیکھ چکے ہیں۔
آپ کا تبصرہ