خلائی دوڑ میں ایران کی لمبی چھلانگ، تین سیٹلائٹ لانچنگ کے لئے تیار 

مہر خبررساں ایجنسی کی رپورٹ کے مطابق، ایران کے خلائی ادارے کے سربراہ حسن سالاریہ نے "ٹیکنالوجی برائے پائیدار ترقی" نامی ایک پروگرام میں اعلان کیا کہ ایران جلد ہی تین سیٹلائٹ — ظفر، پایا اور کوثر — کو مدار میں بھیجے گا۔ یہ لانچنگ موجودہ موسمِ سرما کے آغاز میں متوقع ہے۔

انہوں نے کہا کہ نجی شعبے کی شمولیت سے سیٹلائٹ ڈیٹا پر مبنی خدمات میں نمایاں ترقی ہوئی ہے، جو زرعی پیداوار کے تخمینے، معدنی وسائل کی شناخت، ماحولیاتی نگرانی اور موسمیات جیسے شعبوں میں استعمال ہو رہی ہیں۔

سالاریہ نے مزید بتایا کہ ایران کا 10 سالہ خلائی منصوبہ اپڈیٹ کیا جا رہا ہے، جو منظوری کے بعد سرکاری اداروں، نجی شعبے اور جامعات کے لیے ایک جامع روڈ میپ ہوگا۔ اس منصوبے کا مقصد سیٹلائٹ ڈیٹا کو فیصلہ سازی اور بحرانوں کے انتظام میں مؤثر طور پر استعمال کرنا ہے۔

انہوں نے یہ بھی کہا کہ ایران کے خلائی اڈے الماس اور کناران تکمیل کے آخری مراحل میں ہیں اور جلد فعال ہو جائیں گے۔ ایران چین کے ساتھ قمری منصوبوں اور اکو ممالک کے ساتھ تحقیقی تعاون میں بھی شریک ہے۔