مصری وزیرخارجہ کی عراقچی اور امریکی اعلی عہدیدار سے ٹیلفونک گفتگو، علاقائی صورتحال پر تبادلہ خیال

مہر خبررساں ایجنسی کی رپورٹ کے مطابق، مصری وزیر خارجہ بدر عبدالعاطی نے ایران، امریکہ اور بین الاقوامی ایٹمی توانائی ایجنسی کے اعلی حکام سے اہم ٹیلیفونک رابطے کیے ہیں، جن میں علاقائی سلامتی، استحکام اور کشیدگی میں کمی سے متعلق امور پر تفصیلی گفتگو ہوئی۔

مصری وزارت خارجہ کے بیان کے مطابق، وزیر خارجہ نے ایرانی وزیر خارجہ عباس عراقچی، مشرق وسطی کے امریکی خصوصی ایلچی اسٹیو وٹکاف اور عالمی جوہری ایجنسی کے ڈائریکٹر جنرل رافائل گروسی سے الگ الگ بات چیت کی۔

بیان میں کہا گیا کہ رہنماؤں نے اس بات پر زور دیا کہ ایران اور امریکہ کے درمیان جوہری مسئلے پر جامع معاہدے کے لیے سازگار ماحول پیدا کیا جائے، جو تمام فریقین کے مفادات کا تحفظ کرے اور خطے میں پائیدار امن و استحکام کو فروغ دے۔

مصری وزارت خارجہ کے مطابق، اعلی حکام نے اس بات پر اتفاق کیا کہ رابطوں اور تجاویز پر نظر رکھنے اور متوقع پیش رفت کے لیے سفارتی کوششیں جاری رکھنے کی ضرورت ہے۔