مہر خبررساں ایجنسی کی رپورٹ کے مطابق، اسلامی جمہوری ایران کے صدر ڈاکٹر مسعود پزشکیان اپنے سرکاری دورۂ پاکستان کے سلسلے میں آج ایوان صدر پہنچے جہاں پاکستان کے صدر آصف علی زرداری نے ان کا گرم جوشی سے استقبال کیا۔
اس موقع پر دونوں صدور نے باہمی خیرسگالی کے جذبات کا اظہار کرتے ہوئے ایک دوسرے کے ممالک کے عوام کے لیے نیک خواہشات کا پیغام دیا۔
اس سے پہلے دونوں ملکوں کے اعلی حکام نے علاقائی تعاون، برادرانہ تعلقات اور مشترکہ مفادات پر بات چیت کے عزم کا اعادہ کیا۔
صدر پزشکیان نے بھی پاکستان کی مہمان نوازی اور اسلامی اخوت پر مبنی جذبے کو سراہتے ہوئے کہا کہ دونوں ممالک کے عوام تاریخی، ثقافتی اور دینی رشتوں میں بندھے ہوئے ہیں، جنہیں مزید مضبوط بنانے کی ضرورت ہے۔
صدر مملکت نے کہا کہ پاکستان اور ایران کے برادرانہ تعلقات مشترکہ مذہب، ثقافت اور باہمی احترام پر مبنی ہیں۔
دونوں رہنماؤں نے تنازعات کو بڑھنے سے روکنے اور خطے میں امن و استحکام کے لیے مربوط سفارتی کوششوں کی ضرورت پر زور دیا، صدر آصف علی زرداری نے علاقائی معاملات پر ایران کے اصولی مؤقف کو سراہا اور خطے میں تعاون کے لیے تہران کی مستقل حمایت پر اظہار تشکر کیا۔ صدر مملکت نے مشکل وقتوں میں ایران کی یکجہتی پر شکریہ ادا کیا۔
صدر زرداری نے کہا کہ پاکستان اور ایران خطے کے پُرامن اور خوشحال مستقبل کے لیے مل کر کام جاری رکھیں گے۔
صدر نے رہبرِ معظم آیت اللہ سید علی خامنہ ای کا جموں کشمیر پر بھارتی غیر قانونی قبضے کے خلاف عوام کی مسلسل حمایت پر شکریہ ادا کیا۔ صدر نے ایران کے خلاف اسرائیلی جارحیت کی سخت مذمت کی، صدر نے 12 روزہ جنگ کے دوران ایرانی قوم کی جرات اور اتحاد کو خراجِ تحسین پیش کیا،
صدر زرداری نے امید ظاہر کی کہ صدر پزشکیان کا دورہ برادرانہ تعلقات کو مزید مستحکم کرے گا۔
ایرانی صدر مسعود پزیشکیان نے 12 روزہ جنگ کے دوران پاکستان کی قیادت اور عوام کی حمایت پر شکریہ ادا کیا، صدر پزشکیان نے کہا کہ پاکستان نے کشیدگی میں کمی اور تنازعات کے پُرامن حل کے لیے تعمیری کردار ادا کیا۔
آپ کا تبصرہ