مہر خبررساں ایجنسی، ثقافتی ڈیسک: آج دنیا بھر میں پانچویں امام حضرت امام محمد باقر علیہ السلام کی ولادت کا دن منایا جارہا ہے۔ امام محمد باقرؑ 57 ہجری میں مدینہ منورہ میں پیدا ہوئے۔ آپؑ کا اسمِ گرامی محمد، کنیت ابو جعفر اور القابات باقر اور باقرالعلوم ہیں۔ آپؑ کی والدہ امّ عبداللہ، امام حسن مجتبیٰؑ کی صاحبزادی تھیں، یوں امام باقرؑ کو دونوں جانب سے علوی و حسنی نسبت حاصل ہے۔
نامساعد اور سخت سیاسی حالات کے باوجود امام محمد باقرؑ نے اسلام کی حقیقی تعلیمات کی اشاعت کا فریضہ انجام دیا۔ آپؑ کو فکری و علمی مسائل کی گہرائی سے تحلیل اور توضیح کے باعث خاص شہرت حاصل ہوئی۔ تاریخ گواہ ہے کہ امام باقرؑ نے علم و معرفت کی ایک ہمہ گیر تحریک کی بنیاد رکھی، جس نے بعد ازاں ایک منظم علمی ادارے کی شکل اختیار کی اور امام جعفر صادقؑ کے دور میں عروج کو پہنچا۔
امام باقرؑ کے علمی مقام کا یہ عالم تھا کہ اپنے دور کے جلیل القدر علما اور دانشوران آپؑ سے رجوع کرتے اور پیچیدہ مسائل حل کرتے تھے۔ قرآن، حدیث، فقہ اور کلام میں آپؑ کی تعلیمات نے اسلامی علوم کو استحکام بخشا اور اہلِ بیتؑ کی علمی مرجعیت کو مضبوط بنیاد فراہم کی۔ امام محمد باقرؑ کی قائم کردہ علمی روایت آج بھی اسلامی تہذیب و فکر کی تشکیل میں سنگِ میل کی حیثیت رکھتی ہے۔
حضرت امام محمد باقرؑ کے دور امامت کو اہل بیتؑ کی علمی تحریک کا آغاز کیوں کہا جاتا ہے؟
امام محمد باقرؑ کے دور امامت کو بجا طور پر اہل بیتؑ کی علمی نہضت کا نقطۂ آغاز اس لیے کہا جاتا ہے کہ اس تاریخی مرحلے پر پہلی بار سیاسی، سماجی اور ثقافتی عوامل ایک ساتھ جمع ہوگئے، جن کی بدولت اہل بیتؑ کے معارف کو منظم، وسیع اور نسبتا کھلے انداز میں پھیلانے کا موقع میسر آیا۔ اس سے پہلے ائمہؑ کی کوششوں کا محور سخت جبر اور مسلسل خطرات کے ماحول میں اصل دین کی حفاظت اور تشیع کی بقا تھا، لیکن امام باقرؑ کے زمانے میں یہ مرحلہ بتدریج طے ہوا اور اسلامی معارف کو حقیقی معنوں میں فروغ دینے کی راہ ہموار ہوئی۔
اس تبدیلی کی ایک اہم وجہ عالم اسلام کے مخصوص تاریخی حالات تھے۔ اس زمانے میں اموی حکومت شدید بحرانوں کا شکار تھی۔ ایک طرف حکمران خاندان کے اندرونی اختلافات تھے اور دوسری جانب عوامی احتجاج اور بے چینی میں اضافہ ہورہا تھا، جس سے ان کی سیاسی طاقت کمزور پڑچکی تھی۔ اس کمزوری کے باعث ملوکیت کا نظام پہلے جیسی سختی اور کنٹرول برقرار نہ رکھ سکا اور علمی و ثقافتی سرگرمیوں کے لیے نسبتاً آزادی کی فضا پیدا ہوئی۔ امام محمد باقرؑ نے اس تاریخی موقع کو گہری بصیرت کے ساتھ پہچانا اور امامت کے راستے کو دینی علم کی پیداوار اور اشاعت کی طرف موڑ دیا۔
اس دور میں پہلی مرتبہ اسلامی معارف کی تعلیم کو منظم، مسلسل اور تحریک ساز انداز میں آگے بڑھایا گیا۔ امام باقرؑ صرف احکام بیان کرنے یا وقتی سوالات کے جواب دینے تک محدود نہیں رہے، بلکہ آپ نے دین کو سمجھنے کے لیے ایک منسجم فکری ڈھانچہ پیش کیا۔ فقہ، تفسیر، حدیث اور اعتقادی مباحث جیسے مختلف علوم کی توسیع نے اہلِ بیتؑ کے معارف کو ایک مستقل اور قابل اعتماد فکری مکتب کی حیثیت دی۔ اسی بنیادی اور گہری علمی کاوش کے باعث آپؑ کو “باقرالعلوم” یعنی علوم کو شگافتہ کرنے والا کہا گیا، جو آپؑ کی علمی گہرائی، وسعت اور جدت کی علامت ہے۔
متعدد شاگردوں کی تربیت اور علم کو آئندہ نسلوں تک منتقل کرنا، امام باقرؑ کی علمی تحریک کی ایک خصوصیت تھی۔ امامؑ کے مکتب میں پروان چڑھنے والے شاگرد بعد میں اہلِ بیتؑ کے علوم کے علمبردار بنے اور امام جعفر صادقؑ کے دور میں بے مثال علمی شکوفائی کی بنیاد فراہم کی۔ اسی لیے اس دور کو محض ایک محدود علمی مرحلہ نہیں بلکہ تاریخِ تشیع میں ایک گہرے اور تمدن ساز علمی تحریک کا آغاز سمجھا جاتا ہے۔
امام محمد باقرؑ کے زمانے کے سیاسی و سماجی حالات، آپؑ سے پہلے ائمہؑ کے ادوار سے کس طرح مختلف تھے اور اس فرق کا امامؑ کی علمی سرگرمیوں پر کیا اثر پڑا؟
امام محمد باقرؑ کے دور کے سیاسی اور سماجی حالات، آپؑ سے پہلے ائمہؑ کے زمانے سے بنیادی طور پر مختلف تھے۔ ابتدائی ادوار میں خصوصاً واقعۂ کربلا کے بعد اموی حکومت نے اہلِ بیتؑ سے وابستہ ہر قسم کی سرگرمی کو انتہائی سختی اور تشدد کے ساتھ کچل دیا تھا۔ معاشرے پر خوف، کڑی نگرانی اور شدید دباؤ کا غلبہ تھا، اور ایسے حالات میں وسیع پیمانے پر علمی سرگرمیوں کا تصور بھی ممکن نہیں تھا۔
اس کے برعکس، امام محمد باقرؑ کے زمانے میں اموی حکومت کی واضح کمزوری سامنے آرہی تھی۔ اموی خاندان کے مختلف دھڑوں کے درمیان اختلافات، مختلف علاقوں میں مسلسل بغاوتیں، اور عوامی ناراضی میں اضافے نے سیاسی طاقت کو منتشر کردیا تھا۔ اس صورتحال میں حکومت کی توجہ زیادہ تر اپنی گرتی ہوئی طاقت کو سنبھالنے پر مرکوز ہوگئی اور امامؑ اور اہلِ بیتؑ کی علمی سرگرمیوں کو دبانے پر کوئی دھیان نہیں تھا۔ چنانچہ امامؑ پر براہ راست دباؤ میں کمی آئی اور عوام و شاگردوں سے رابطے کے نئے مواقع پیدا ہوئے۔
سماجی اعتبار سے بھی اسلامی معاشرہ ایک نئے مرحلے میں داخل ہوچکا تھا۔ مسلمانوں کی ایک نئی نسل سامنے آچکی تھی جس نے نہ رسول اکرمؐ کا زمانہ دیکھا تھا اور نہ ہی ابتدائی خلفا کا دور، اور ان کے ذہنوں میں دین کے بارے میں نئے سوالات تھے۔ اسلامی سلطنت کے پھیلاؤ، مختلف تہذیبوں اور افکار کے داخل ہونے، اور فکری اختلافات میں اضافے نے دین کی علمی اور منظم توضیح کی ضرورت کو مزید بڑھا دیا تھا۔ یہ تمام عوامل امامؑ کی علمی سرگرمیوں کے لیے ایک موزوں ماحول فراہم کر رہے تھے۔
امام محمد باقرؑ نے ان حالات کو گہرے شعور کے ساتھ پہچانا اور اپنی علمی سرگرمیوں کو فعال اور مسلسل انداز میں منظم کیا۔ آپؑ نے تعلیمِ دین کو محدود اور محض دفاعی مرحلے سے نکال کر ایک منظم اور آگے بڑھنے والی تحریک میں تبدیل کردیا۔ حالات میں آنے والی اس تبدیلی نے امامؑ کو یہ موقع دیا کہ وہ نہ صرف اپنے دور کے فکری مسائل کا جواب دیں بلکہ اسلامی معاشرے کے فکری مستقبل کے لیے بھی منصوبہ بندی کریں اور اہل بیتؑ کی علمی مرجعیت کو مضبوط بنیادوں پر قائم کریں۔
امام محمد باقرؑ کا شاگردوں کی تعلیم و تربیت کا طریقۂ کار کیا تھا اور اس میں سابقہ ادوار سے کیا فرق نظر آتا ہے؟
امام محمد باقرؑ کا تعلیمی و تربیتی اسلوب آپؑ کے دورِ امامت کی نمایاں ترین خصوصیات میں سے ایک ہے۔ امامؑ تعلیم اور تربیت کو ایک طویل المدت اور بامقصد عمل سمجھتے تھے۔ آپؑ کے نزدیک دینی تعلیم کا مقصد صرف معلومات کی منتقلی یا بکھرے ہوئے سوالات کے جواب دینا نہیں تھا، بلکہ ایسے باشعور، صاحبِ بصیرت اور ذمہ دار افراد کی تربیت کرنا تھا جو آئندہ معاشرے کی رہنمائی کا فریضہ انجام دے سکیں۔
اس طریقۂ تعلیم کی ایک اہم خصوصیت تعلیم کا تخصصی ہونا تھا۔ امامؑ شاگردوں کی صلاحیت اور علمی استعداد کو مدنظر رکھتے ہوئے انہیں مختلف شعبوں، جیسے فقہ، تفسیر، حدیث اور علمِ کلام میں تربیت دیتے تھے۔ اس حکمتِ عملی کے نتیجے میں ہر شاگرد اپنے مخصوص میدان میں ایک علمی حوالہ بن کر ابھرا اور یوں معاشرے میں شیعہ علما کا ایک منظم علمی نیٹ ورک وجود میں آیا۔ یہ اندازِ تعلیم سابقہ ادوار سے واضح طور پر مختلف تھا، جہاں شدید دباؤ اور تقیہ کے باعث معارف کی ترسیل محدود اور زیادہ تر انفرادی سطح پر ہوتی تھی۔
اس تعلیمی طریقے کی ایک اور نمایاں خصوصیت دین کی گہری اور استدلالی فہم پر زور تھا۔ امام محمد باقرؑ شاگردوں کو غور و فکر، سوال کرنے اور عقلی تجزیے کی ترغیب دیتے تھے اور اندھی تقلید سے روکتے تھے۔ اس رویے نے اہلِ بیتؑ کے معارف کو محض منتشر روایات کے مجموعے کے بجائے ایک منظم اور مربوط فکری نظام کی صورت میں پیش کیا۔
اس کے ساتھ ساتھ امامؑ نے شاگردوں کی تربیت میں علم کے اخلاقی اور عملی پہلو پر خصوصی توجہ دی۔ امام باقرؑ کے مکتب میں شاگرد ہونا اخلاقی وابستگی، عملی پابندی اور سماجی ذمہ داری کا تقاضا کرتا تھا۔ اسی جامع تربیت کے نتیجے میں ایسے علما تیار ہوئے جنہوں نے علم کو ذاتی مفاد یا اقتدار کے بجائے معاشرے کی ہدایت اور دین کی اصالت کے تحفظ کے لیے استعمال کیا۔
امام محمد باقرؑ کے زمانے میں اسلامی معاشرے کا فکری و ثقافتی ماحول کیسا تھا اور آپؑ مختلف فکری جریانوں سے کیسے نمٹتے تھے؟
امام محمد باقرؑ کے دور میں اسلامی معاشرے کا فکری و ثقافتی ماحول متنوع، پیچیدہ اور کچھ حد تک مبہم تھا۔ اسلام کے جغرافیائی پھیلاؤ کے سبب مختلف افکار، فلسفے اور ثقافتی روایات داخل ہوچکی تھیں، جس سے عقائد اور دینی احکام کی تفہیم میں شدید اختلافات پیدا ہو گئے تھے۔ مختلف کلامی فرقے ابھرچکے تھے اور ہر ایک دین کی اپنی تشریح پیش کر رہا تھا۔
ایسے حالات میں دینی معارف کے تحریف کا خطرہ بہت زیادہ محسوس کیا جاتا تھا۔ عام لوگ اکثر حق و باطل میں تمیز نہیں کر پاتے تھے، اور بعض اوقات دین سیاسی طاقتوں یا انحرافی تحریکوں کے ہاتھ میں آلہ کار بن جاتا تھا۔ امام محمد باقرؑ نے اس صورتحال میں جذباتی یا پرتشدد رویے کے بجائے ایک علمی اور شعور پر مبنی موقف اپنایا۔
آپؑ نے قرآن کریم اور پیغمبر اکرمؐ کی حقیقی سنت کی بنیاد پر دین کی صحیح تفہیم کے معیار قائم کیے اور عقلی استدلال کے ذریعے غلط نظریات پر تنقید کی۔ اس روش نے نہ صرف حق و باطل کے فکری حدود واضح کیں بلکہ اہلِ بیتؑ کو دینی معرفت کے معتبر اور قابل اعتماد مرجع کے طور پر مستحکم کیا۔ امام باقرؑ نے ثابت کیا کہ فکری بحرانوں کا جواب علم، گفتوگو اور عالمانہ تبیین کے ذریعے دینا زیادہ مؤثر ہوسکتا ہے۔
اس معقول اور واضح مؤقف نے معاشرے میں فکری انتشار کو کم کرنے، عقلانیت پر مبنی دینی سوچ کو فروغ دینے اور آئندہ دور میں ایک وسیع علمی مکتب کے قیام کے لیے بنیاد فراہم کی۔
آپ کا تبصرہ