ہندوستان بھر میں یوم عاشورا عقیدت سے منایا گیا، رہبر انقلاب کی تصاویر نمایاں+ تصاویر

مہر خبررساں ایجنسی کے مطابق، پورے ہندوستان میں 10 محرم الحرام، یومِ عاشوراء، نہایت عقیدت، احترام اور نظم و ضبط کے ساتھ منایا گیا۔ ملک کے مختلف شہروں، قصبوں اور دیہاتوں میں جلوس ہائے عزا برآمد ہوئے، جن میں عزادارانِ امام حسین علیہ السلام نے گہرے رنج و غم کے ساتھ شہدائے کربلا کو خراج عقیدت پیش کیا۔

اس سال کشمیر، کارگل، لکھنؤ، میرٹھ، ممبئی، وجے واڑا، امروہہ، کولکاتہ، بہرائچ، نوگاواں سادات وغیرہ کے جلوسوں میں ایک خاص بات یہ رہی کہ شہیدِ کربلا حضرت امام حسین علیہ السلام کے علمِ مبارک کے ساتھ ساتھ، رہبرِ معظم انقلاب اسلامی حضرت آیت اللہ العظمیٰ سید علی خامنہ ای کی تصاویر بڑی عقیدت کے ساتھ لگائی گئی تھیں۔ عزاداران نے نہ صرف رہبرِ انقلاب کی حمایت اور محبت کا اظہار کیا بلکہ دیگر مراجع عظام، بالخصوص آیت اللہ العظمیٰ سید علی حسینی سیستانی کی تصاویر بھی اپنے ساتھ اٹھا رکھی تھیں۔

اس کے علاوہ، جلوسوں میں سید مقاومت شہید سید حسن نصر اللہ کی تصاویر بھی عزاداروں کی عقیدت و جذبے کی عکاسی کر رہی تھیں، عزاداران نے ان تصاویر کے ذریعے نہ صرف ان رہنماؤں سے وابستگی کا اظہار کیا بلکہ عالمی استکبار کے خلاف بیداری اور وحدت کے پیغام کو بھی عام کیا۔

یومِ عاشورا کے یہ جلوس جہاں امام حسین علیہ السلام کی عظیم قربانی کی یاد تازہ کرتے ہیں، وہیں ان میں شامل تصاویر، بینرز اور نعرے آج کے دور کے مظلوموں کے ساتھ یکجہتی کا عملی مظاہرہ بنے۔

قابلِ ذکر بات یہ ہے کہ "Khamenei The Great" مہم نے بھی اس عوامی شعور اور جذبۂ وابستگی کو مزید تقویت دی اور اس اقدام کو بھرپور انداز میں آگے بڑھایا۔