امریکا کے سابق صدر ڈونلڈ ٹرمپ پر جیوری نے فرد جرم عائد کرنے کا فیصلہ کرلیا گیا، امریکی تاریخ میں یہ پہلا موقع ہوگا کہ کسی بھی موجودہ یا سابق صدر کو کرمنل چارجز کا سامنا کرنا پڑے گا۔
مین ہٹن کی گرینڈ جیوری نے معاملے پر ووٹنگ کی ہے اور امریکی میڈیا کے مطابق جیوری اس نتیجے پر پہنچی ہے کہ سابق صدر کے خلاف کارروائی کی جانی چاہیے۔
مین ہٹن ڈسٹرکٹ اٹارنی کا دفتر سابق صدر کیخلاف الزامات کی تحقیقات کر رہا تھا، یہ الزامات فحش فلموں کی اداکارہ اسٹارمی ڈینئلز کو معاملات چھپانے کے لیے رقوم کی ادائیگی سے متعلق دعوؤں کے بارے میں ہیں اور ان کا تعلق 2016ء کے صدارتی الیکشن کے وقت سے ہے۔
