ایران کا روس اور چین سمیت 6 ملکوں میں تجارتی مراکز قائم کرنے کا اعلان

مہر خبررساں ایجنسی کی رپورٹ کے مطابق اسلامی جمہوریہ ایران نےروس اور چين سمیت خطے 6 ملکوں میں مستقل تجارتی مراکز قائم کرنے کا اعلان کیا ہے۔ایران کے ادارہ فروغ برآمدات کے ڈپٹی ڈائریکٹر محمد رضا نے اصفہان میں ایک اجلاس سے خطاب کرتے ہوئے کہا کہ ایران نجی شعبے کے تعاون سے 6 ملکوں میں تجارتی مراکز قائم کر رہا ہے۔انہوں نے کہا کہ یہ مراکز، چین، روس، عراق، افغانستان، لبنان، شام اور آذربائیجان میں قائم کیے جائیں گے۔ انھوں نے کہا کہ ایران کا پہلا بیرونی تجارتی مرکز چین کے شہر شنگھائی میں قائم کیا جائے گا۔ جس کے لیے ایک چینی کمپنی سرمایہ فراہم کرے گی۔انہوں نے کہا کہ2700 مربع میٹر رقبے پر اس مرکز کے قیام سے ایران کو چین میں اپنی مصنوعات متعارف کرانے اور مناسب منڈی حاصل کرنے کا موقع ملے گا۔