جنرل راحیل شریف کا افغان صدر اشرف غنی کو فون

مہر خبررساں ایجنسی نے ڈیلی پاکستان کے حوالے سے نقل کیا ہے کہ پاکستانی فوج کے سربراہ جنرل راحیل شریف نے افغان صدر اشرف غنی کو ٹیلی فون کیا اور لاپتہ ہونے والے پاکستانی ہیلی کاپٹر میں موجود عملے کی باحفاظت بازیابی کے لیے تعاون کی درخواست کی ہے۔پاکستانی  فوج کے شعبہ تعلقات عامہ (آئی ایس پی آر) کے مطابق آرمی چیف جنرل راحیل شریف کی جانب سے افغان صدر اشرف غنی کوٹیلی فون کیا گیا،  آرمی چیف نے افغان صدراشرف غنی سے لاپتہ ہونے والے پاکستانی ہیلی کاپٹر میں موجود عملے کی باحفاظت بازیابی کے لیے تعاون کی درخواست کی۔ ادھر افغان صدراشرف غنی کی جانب سے بھی اس معاملے پر مکمل تعاون کی یقین دہانی کرائی گئی ہے۔واضح رہے کہ گزشتہ روز پنجاب حکومت کا ایم آئی 17 ہیلی کاپٹر پشاور سے ازبکستان جارہا تھا کہ اس دوران ہیلی کاپٹر کو افغانستان کے صوبے لوگر میں ہنگامی لینڈنگ کرنا پڑی جہاں طالبان نے ہیلی کاپٹر میں سوار 6 پاکستانی اور ایک روسی کو یرغمال بنا کر ہیلی کاپٹر کو آگ لگادی ۔ جنرل راحیل شریف نے افغانستان میں امریکی کمانڈر جنرل نکلسن سے  بھی رابطہ کرکے ہیلی کاپٹر کے عملے کی بازیابی کے لئے مدد کی درخواست کی تھی جس پر جنرل نکلسن نے تعاون کی مکمل یقین دہانی کرائی ہے۔