پاکستان کے وزیر اعظم سمیت 26 سیاستدانوں کے بیرون ملک اثاثےوطن واپس لانے کی درخواست منظور

مہر خبررساں ایجنسی نےپاکستانی ذرائع کے حوالے سے نقل کیا ہے کہ پاکستان کے ہائی کورٹ نے پاکستانی  وزیراعظم نوازشریف، عمران خان، ڈاکٹر فاروق ستار اور چوہدری شجاعت حسین سمیت 26 سیاستدانوں کے اثاثے بیرون ملک سے وطن واپس لانے کے لیے درخواست سماعت کےلیے منظور کرلی ہے۔

اطلاعات کے مطابق جسٹس خالد محمود خان نے 26 سیاست دانوں کے اثاثے وطن واپس لانے کےلئے دائر درخواست پر سماعت شروع کی تو درخواست گزار کے وکیل اقبال جعفری نے موقف اختیار کیا کہ وزیراعظم میاں نوازشریف، عمران خان، وزیراعلیٰ پنجاب شہبازشریف، چوہدری شجاعت اور ڈاکٹر فاروق ستار سمیت 26 سیاستدانوں نے غیرقانونی طورپر اربوں روپے کے اثاثے بیرون ملک منتقل کیے ہیں۔وکیل نے عدالت سے استدعا کی کہ عدالت اثاثوں کو ملک میں واپس لانے کا حکم دے کر انہیں قومی خزانے میں جمع کروانے کی ہدایت کرے۔ عدالت نے درخواست سماعت کےلیے منظور کرتے ہوئے وفاقی اور صوبائی حکومتوں سمیت 26 سیاستدانوں کو 19 مئی تک جواب داخل کرنے کے لئے نوٹس جاری کردیئے ہیں۔