اسلام آباد کے نواح میں فوجی ڈپو میں دھماکہ

مہر خبررساں ایجنسی نے پاکستانی ذرائع کے حوالے سے نقل کیا ہے کہ پاکستان کے دارالحکومت اسلام آباد کے قریب ایک فوجی ڈپو میں دھدماکے میں ایک اہلکار ہلاک اور 3 افراد زخمی ہوگئے ہیں۔اسلام آباد کے نواحی علاقے سہالہ میں ایک فوجی ڈپو میں مختلف نوعیت کے دھماکے ہوئے ہیں جس میں ابتدائی معلومات کے مطابق ایک اہلکار شہید جبکہ تین افراد زخمی ہوئے ہیں۔ دھماکے ،اسلام آباد ہائی وے پر دریائے سواں کے کاک پل کے قریب ہوئے ،سہالہ کا یہ علاقہ آزاد کشمیر کو ملانے والی سڑک پر واقع ہے جبکہ اس کے قریب پولیس کا تربیتی مرکز بھی واقع ہے ، حکام کے مطابق دھماکے فوج کے تیل ڈپو اور اسلحہ ذخیرہ کے مقامات پر ہوئے، دھماکے کی اطلاع ملتے ہی امدادی اداروں اور فوج کی ایمبولنس گاڑیاں اور فائر بریگیڈ موقع پر پنہنچ گئیں، جبکہ اسلام آباد کے پمز اور راول پنڈی کے ملٹری اسپتال میں ہنگامی طبی امداد کے انتظامات کردئے گئے، عینی شاہدین کے مطابق دھماکے والے مقام سے تین زخمیوں کو اسپتال بھیجا گیا ، دھماکے کے مقام پر کچھ دیر بعد سول امدادی اداروں کی ایمبولنس گاڑیوں کو واپس بھیج دیا گیا اور صرف فوجی ایمبولنس اور فائر بریگیڈ کو ڈپو کے اندرجانے دیا گیا ، فوجی اہل کاروں نے میڈیا والوں کو جائے وقوعہ کے قریب جانے اور مقامی پولیس کو واقعہ سے متعلق کسی قسم کی تفصیلات میڈیا کو بتانے سے روک دیا ہے۔