امریکی وزیر خارجہ کی نتن یاہو سے ٹیلیفونک گفتگو، غزہ کے حالات پر اظہار تشویش

مہر خبررساں ایجنسی کی رپورٹ کے مطابق، امریکی وزیر خارجہ مارکو روبیو نے صہیونی وزیراعظم نتن یاہو سے ٹیلیفون پر گفتگو کی، جس میں انہوں نے غزہ کی جاری جنگ اور وہاں کی صورت حال پر تبادلہ خیال کیا۔

روبیو نے ترک شہر انطالیہ میں صحافیوں سے بات کرتے ہوئے کہا کہ ہم غزہ میں انسانی بحران کو نظرانداز نہیں کر رہے، 2 مارچ کے بعد سے اب تک کوئی بھی انسانی امداد وہاں نہیں پہنچی۔

روبیو نے صہیونی حکومت کے مظالم کو نظر انداز کرتے ہوئے غزہ کی موجودہ صورتحال کا ذمہ دار ایک بار پھر حماس کو قرار دیا۔

روبیو نے امریکہ اور اسرائیل کی مشترکہ جانب سے غزہ میں امداد کی تقسیم کے منصوبے کی حمایت کی اور اس پر ہونے والی تنقیدوں کو غیر اہم قرار دیا۔

واضح رہے کہ عالمی سطح پر غزہ میں انسانی المیے پر شدید تشویش پائی جاتی ہے اور امریکہ پر دوہرا معیار اپنانے کا الزام بھی لگ رہا ہے، جہاں ایک طرف وہ انسانی ہمدردی کی بات کرتا ہے تو دوسری جانب اسرائیل کو مسلسل فوجی و سیاسی حمایت فراہم کر رہا ہے۔