"میری موت کا ذمہ دار تم ہو"، صہیونی یرغمالی کا نتانیاہو سے خطاب+ ویڈیو

مہر خبررساں ایجنسی کے مطابق، تحریک جہاد اسلامی کے عسکری ونگ القدس بریگیڈ نے ایک اسرائیلی یرغمالی کا ویڈیو پیغام جاری کیا ہے جس میں اس نے اسرائیلی وزیر اعظم بنیامین نتن یاہو کو اپنی ممکنہ ہلاکت کا ذمہ دار قرار دیا ہے۔

شہاب نیوز کے مطابق القدس بریگیڈ نے اسیر اسرائیلی بارون بارسلافسکی کا وڈیو پیغام جاری کیا ہے۔ اس پیغام میں بارون کہتا ہے کہ ایک سال اور چھ ماہ گزر چکے ہیں، ایک نہ ختم ہونے والا درد اور جہنم جیسی زندگی۔ میں بیمار ہوں، نہ کھانا ہے نہ پانی۔ ہر طرف بمباری ہے۔ کل کا بم میرے سر پر گرے گا۔

یرغمالی مزید کہتا ہے کہ نتن نیاہو! میرے خون کی ذمہ داری تم پر ہے۔ بن گویر! ہمیں یہاں مت چھوڑو۔ کیوں ہمیں مرنے کے لیے چھوڑ دیا گیا ہے؟ صرف عیدان الکساندر کی رہائی کے لیے معاہدہ کیوں؟ کیا وہ اسرائیل کا بادشاہ ہے؟ کیا وہ ہم سے بہتر ہے؟

بارون نتن یاہو کو مخاطب کرتے ہوئے مزید کہتا ہے کہ تم اپنے گھر میں ہو، ملکوں کے دورے کر رہے ہو۔ میں یہاں قید میں ہوں۔ ہم کبھی واپس نہیں آئیں گے بلکہ مرجائیں گے۔

یرغمالی امریکی صدر سے مخاطب ہوکر کہتا ہے کہ ٹرمپ! تمہارے وعدے کہاں گئے؟ تم نے جو راستہ چنا وہ تباہی کا ہے۔ 7 اکتوبر کو تم شکست کھا چکے ہو، اور میرے لیے وہ دن آج بھی ختم نہیں ہوا کیونکہ میں ابھی تک اپنے گھر نہیں لوٹا۔ نتن یاہو! خدا کے لیے مجھے یہاں سے نکالو، اس خوفناک خواب کا خاتمہ کرو۔ کم از کم کھانے اور پانی کی اجازت دو، جھوٹ بولنا بند کرو۔ یا تو جنگ بند کرو اور ہمیں واپس لاؤ، یا پھر جنگ جاری رکھو تاکہ ہم میں سے کوئی بھی اپنے گھر واپس نہ جا سکے۔