ٹرمپ مسئلہ کشمیر حل کرسکتے ہیں، مائیک پینس

مہر خبررساں ایجنسی نے ذرائع کے حوالے سے نقل کیا ہے کہ نومنتخب نائب امریکی صدر مائیک پینس کا کہنا ہے کہ ڈونلڈ ٹرمپ اپنی سودے بازی کی غیرمعمولی صلاحیت کی وجہ سے مسئلہ کشمیر حل کرسکتے ہیں۔ مائیک پینس کا کہنا تھا کہ نومنتخب امریکی صدر ڈونلڈ ٹرمپ اپنی غیرمعمولی سودے بازی کی مہارت کی بدولت دنیا میں موجود تنازعات اور خاص طور پر مسئلہ کشمیر سمیت تمام مسائل حل کرنے کی صلاحیت رکھتے ہیں جب کہ نئی امریکی انتظامیہ جنوبی ایشیا میں مکمل طور پر اپنی توجہ مرکوز کئے ہوئے ہے اور خاص طور پر خطے میں امن اور سیکیورٹی کے لئے بھارت اور پاکستان سے بات کرنے کے لئے تیار ہیں۔ انہوں نے کہا کہ پاکستان اور بھارت کے درمیان مسئلہ کشمیر کی وجہ سے کشیدگی ہے جب کہ ڈونلڈ ٹرمپ نے پاکستانی وزیراعظم نواز شریف سے فون پر بات کی اور نواز شریف نے مسئلہ کشمیر کے حل کے لئے انہیں ثالث کا کردارادا کرنے کی بھی پیش کش کی۔

نائب امریکی صدرنے کہا کہ ڈونلڈ ٹرمپ اب تک 50 ممالک کے سربراہان سے فون پر بات کرچکے ہیں اور ان کے درمیان ہونے والی بات چیت ذاتی ہے جس میں انہیں مبارکبادیں دی جارہی ہیں جب کہ نئے امریکی صدر کو اس بات کی اجازت ہے کہ وہ دنیا بھر میں موجود امریکی مفادات کا تحفظ کریں۔ انہوں نے کہا کہ ڈونلڈ ٹرمپ سب سے پہلے امریکہ میں موجود امریکی مفادات کا تحفظ چاہتے ہیں جس میں معیشت کی بحالی اور امریکی نوجوانوں کی ملازمتوں کے مسئلے کا حل شامل ہے۔