لیبیا میں فورسز اور شدت پسندوں کے درمیان جھڑپوں میں 38 افراد ہلاک

مہر خبررساں ایجنسی نے عرب ذرائع کے حوالے سے نقل کیا ہے کہ لیبیا کے دوسرے بڑے شہر بن غازی میں سیکیورٹی فورسز اور شدت پسندوں کے درمیان تازہ جھڑپوں میں سیکیورٹی اہلکاروں سمیت 38افراد ہلاک اور متعدد زخمی ہوگئے ہیں۔ شدت پسندوں نے شہر کے وسط میں واقع خصوصی فورسز کے ہیڈ کوارٹر پر اچانک حملہ کردیا جس میں متعدد فوجی اہلکار ہلاک اور زخمی ہوئے جبکہ دیگر علاقوں میں بھی جھڑپ کے دوران کئی افراد ہلاک و زخمی ہوئے۔ دوسری جانب شدت پسندوں کی خود ساختہ شوریٰ کے ترجمان نے سیکیورٹی فورسز پر حملوں کی ذمہ داری قبول کرتے ہوئے کہا ہے کہ تازہ جھڑپوں میں ان کے 8 جنگجو مارے گئے۔ واضح رہے کہ گزشتہ 2 ہفتوں سے فورسز اور شدت پسندوں کے درمیان جاری جھڑپوں کے دوران اب تک مجموعی طور پر 97 افراد ہلاک اور 400 زخمی ہوچکے ہیں جبکہ جھڑپوں کے باعث بن غازی کے کئی علاقوں سے لوگ نقل مکانی کرچکے ہیں۔