صہیونی حکومت کے زوال کا آغاز ہوگیا ہے، امام جمعہ تہران

مہر خبررساں ایجنسی کی رپورٹ کے مطابق، نماز جمعہ تہران کے خطیب حجت الاسلام محمد جواد حاج علی اکبری نے کہا ہے کہ صہیونی حکومت کی جنایت کی وجہ سے گذشتہ جمعہ ایرانی قوم نے اپنے عزیز ترین کمانڈروں اور سائنسدانوں سمیت ہم وطنوں کی جدائی کا داغ سہا۔ جنرل باقری، جنرل سلامی، جنرل حاجی زادہ، ڈاکٹر طہرانچی، عباسی، فقیہی جیسے عزیزوں کو ہم نے کھو دیا۔

انہوں نے کہا کہ دنیا کے پلید ترین لوگوں نے ان کو شہید کردیا۔ اگر ان میں سے کوئی ایک ہی شہید ہوتا تب بھی پوری ایرانی قوم سڑکوں پر نکل آتی۔ ان میں سے ہر شہید کو ہم خراج عقیدت پیش کرتے ہیں۔ ان میں سے ہر ایک نئی نسل کے لئے نمونہ عمل بنے گا۔

انہوں نے کہا کہ احمق نتن یاہو نے اس وقت ایران پر جارحیت کی جب امریکہ اور ایران کے درمیان مذاکرات ہورہے تھے اور اتوار کے دن اگلا مرحلہ ہونا تھا لیکن صہیونی حکومت نے بزدلانہ حملہ کیا۔ امریکی صدر ظاہری طور ایران پر اسرائیلی حملے کے خلاف تھے۔ ٹرمپ اور نتن یاہو کی گفتگو خودفریبی تھی۔

حجت الاسلام علی اکبری نے کہا کہ منصوبے کے تحت صہیونی حکومت نے پہلے مرحلے میں رہائشی علاقوں پر حملہ کرکے بے گناہ شہریوں سمیت اہم کمانڈروں اور سائنسدانوں کو شہید کردیا۔ دوسرے مرحلے میں ایرانی عوام کو اقتصادی مشکلات کے پیش نظر سڑکوں پر نکال کر حکومت اسلامی کے خلاف اکسانا تھا۔ دشمنوں کے اندازے غلط ثابت ہوئے۔ رہبر معظم نے انتہائی مدبرانہ انداز میں قیادت کرتے ہوئے مختصر مدت میں شہید کمانڈروں کا جانشین مقرر کیا اور مسلح افواج نے اسرائیل کے خلاف وعدہ صادق 3 آپریشن شروع کیا۔

انہوں نے کہا کہ وعدہ صادق 3 آپریشن کے بعد صہیونی حکومت کے زوال کا آغاز ہوگیا ہے۔ ایرانی مسلح افواج رہبر معظم کے فرمان کے مطابق اسرائیل کو بے بس کرکے رکھ دیں گی۔