تین امریکی شہریوں کا ڈبلیو ایچ او پر ہرجانے کا دعوی

مہر خبررساں ایجنسی نے غیر ملکی ذرائع کے مطابق امریکی صدر ڈونلڈ ٹرمپ کے بعد اب امریکی شہری بھی کورونا وائرس کے بجائے ہاتھ دھو کر عالمی ادارہ صحت ( ڈبلیو ایچ اور) کے پیچھے پڑگئے ہیں۔ نیویارک کے تین شہریوں نے عالمی ادارہ صحت کے خلاف عدالت میں ہرجانے کا دعویٰ دائر کر دیا۔ فیڈرل کورٹ میں دائر کیے گئے دعوے میں عالمی ادارۂ صحت پر کورونا سے بچاؤ کے لیے بروقت اقدامات، منظم عالمی کوششوں اور آگہی دینے میں ناکامی کا الزام عائد کیا گیا ہے۔ امریکی شہریوں کے ہرجانے کے دعوے میں کورونا کو عالمی وباء قرار دینے میں تاخیر، علاج کےلیے گائیڈ لائنز اور سفری پابندیوں کا مشورہ نہ دینا بھی شامل ہیں۔ ہرجانے میں ڈبلیو ایچ او پر کورونا کو چھپانے میں چین کا ساتھ دینے کا بھی الزام شامل ہے تاہم چین کو فریق نہیں بنایا گیا ہے۔ دعوے میں ڈبلیو ایچ او سے نیویارک کی ویسٹ چیسٹر کاؤنٹی کے ساڑھے 7 لاکھ رہائشیوں کو پہنچنے والے ناقابلِ شمار نقصان پر معاوضے کا مطالبہ کیا گیا ہے تاہم رقم کا تعین نہیں کیا گیا۔امریکہ میں کورونا وائرس سے بدترین نقصان ریاست نیویارک میں پہنچا ہے جہاں کورونا وائرس سے 18ہزار 929 افراد موت کے منہ میں جا چکے ہیں جبکہ اس وباء سے 2 لاکھ 52 ہزار 94 افراد متاثر ہوئے ہیں۔ ادھر امریکہ بھری میں کورونا وائرس سے مجموعی ہلاکتیں 42 ہزار 518 ہو گئیں جبکہ اس سے بیمار ہونے والوں کی مجموعی تعداد 7 لاکھ 92 ہزار 938 ہو گئی ہے۔