القسام کی صہیونی یرغمالیوں سے متعلق وڈیو نے تل ابیب کو ہلا کر رکھ دیا

مہر خبررساں ایجنسی کی رپورٹ کے مطابق، صہیونی حکام نے القسام بریگیڈز کی جانب سے حال ہی میں جاری کی گئی اس وڈیو پر شدید ردعمل ظاہر کیا ہے جس میں ایک اسرائیلی قیدی کو نہایت لاغر اور نحیف حالت میں دکھایا گیا ہے۔

تفصیلات کے مطابق صہیونی وزارت خارجہ نے اس وڈیو پر ردعمل دیتے ہوئے کہا کہ یہ غزہ میں حقیقی قحط کی ایک جھلک ہے۔ غزہ میں موجود تمام صہیونی قیدیوں کو فوری طور پر رہا کیا جانا چاہیے۔ ہمارے قیدی بھوکے ہیں اور ان پر تشدد کیا جا رہا ہے۔

دوسری جانب اسرائیلی قیدیوں کے اہل خانہ نے بھی بیان جاری کرتے ہوئے کہا کہ ہم جو وڈیوز دیکھ رہے ہیں وہ صرف ایک چھوٹا سا حصہ ہیں ان اذیتوں کا جو ہمارے بچے سہہ رہے ہیں۔ اسرائیل کی جانب سے معاہدے کے لیے رکھی گئی شرائط غیر حقیقت پسندانہ ہیں۔ اگر اسرائیل جنگ بند کرے تو ہمارے تمام بچوں کی واپسی ممکن ہے۔ غزہ میں فوجی کارروائیوں میں شدت لانا ہمارے بچوں کے لیے موت کے پروانے کے مترادف ہے۔

قیدیوں کے اہل خانہ نے مزید کہا کہ ہم سڑکوں پر احتجاج کا مطالبہ کرتے ہیں۔ جب تک کابینہ پر حقیقی دباؤ نہیں ڈالا جاتا، ہمارے بچوں کی رہائی ممکن نہیں۔